Timmisartortartoq ajutoortoq nersorneqartoq

Qaqortup kujataata kitaani Tyskip timmisartua ataasinngornermi juulip 29-ani imaanut nalaatsornerinnakkut mimmat annaassiniartoqarluarpoq.

Pisimasoq, tusagassiuutit arlallit timmisartup nakkarneratut allaaserineqartup, timmisartulli Piper PA-46 Malibup Canadami Goose Bay-imiit Narsarsuarmut aqqutaani motooriminik ajoquteqarnera pissutigalugu ajornartoorluni mittuuvoq.

Timmisartoq Pan-Panimik kalerrisaareqqaaraluartoq kinguninngualu ajornartorsiulerami ingerlaannaq Maydayimik kalerrisaarivoq. Pan-Pan tassaavoq nunani tamalaani timmisartumi ilaasut atortullu ulorianartorsiornerannik kalerrisaarutaasoq, piffissallu sivikitsup iluani ikiuisussannik takkuttoqanngippat - Mayday-ilu tassaavoq erngertumik ikiorneqarnissamik pisariaqartitsineq.

Timmisartoq motooriminik unittoormat timmisartortartullu imaanut mittariaqalermat Mayday kalerrisaarutigineqarpoq.

Annaassiniarnerup annertooq

Taamatut pisoqaraangat pisarnertut Naviair aamma Issittumi Sakkutooqarfik Nuummiittoq kalerrinneqarput. Annaassiniarnermik annertuumik aallartitsisoqarpoq, umiarsuarlu alapernaarsuut Triton ajunaartoqartillugu minnermiit nalunaaquttap-akunnerata affaa qaangiuttoq ilaasut marluk annaassiniarnerminni umiatsiaminnit annaallugit — ajunngitsut.

- Annaassiniarneq Naviair-ip timmisartunik paasissutissiisarfianiit (FIC) aamma annaassiniarnermi ataqatigiissaarivimmit (RCC) Nuummiittumit Issittumi Sakkutooqarfik suleqatigalugu ataqatigiissarneqarpoq, Kristoffer Heiselberg Naviair-imeersoq oqarpoq.

- Naviair/FIC annaassiniarnermi SMC-tut (SAR Mission Coordinator), tassa annaassiniarnermi ataqatigiissaarisuulluni, annaassiniarnermi pingaarnertut inissisimaffeqarluni, ilaatigut Issittumi Sakkutooqarfimmik ikioqqulluni.

Timmisartoq Challenger umiarsuarlu alapernaarsuut Triton qanittuaniittut paasinarsivoq. Challengerimi inuttat timmisartup sumiinnera ingerlaannaq paasivaat, immallu qaavanut mikkiartornera silaannarmit malinnaavigalugu.

Timmisartoq imaanut mereermat angutit marluk timmisartumiit annaassiniarnerminni umiatsiaaqqamut ikaarput, timmisartullu Challengerip inuttaanut ajutoorfiup qulaaniittunut aalaterillutik.

Umiarsuaq alapernaarsuut Triton umiatsiaaqqap sumiiffiata tungaanut aallareersimavoq minutsillu 30-t ingerlanerinnaanni inuit marluk Tritonip gummibådianut ikillugit annaanneqarput. Tritonimi nakorsap misissorpai Qaqortumukaanneqarpullu tassani Kalaallit Nunaanni Politiinit apersorneqarlutik.

Suleqatigiilluarneq

Annaassiniarnerup kingorna Issittumi Sakkutooqarfik Naviair-ilu tusagassiuutinut nalunaaruteqarlutik immikkoortortat suleqatigiilluarnerat erseqqissarpaat. Nuummi Issittumi Sakkutooqarfiup qullersaqarfiata aamma Issittumi Sakkutooqarfiup ataani sakkutooqarfiit timmisartortartut sakkutuullu imarsiortut suleqatigiilluarnerat Issittumi Sakkutooqarfiup aamma erseqqissarpaa.

Annaassinerup iluatsilluarsimaneranik oqaluttuaq nunarsuaq tamakkerlugu tusagassiuutitigut aamma saqqummiunneqarpoq – USA-milu YouTubekkut aallakaatitassiami Taking Off-imi pisimasup misissorneqarpoq. Silaginnerata timmisartortartullu ajutoortumiittup piareersarluarsimanera pisumi ajoquteqanngitsumik iliortoq tusagassiorfiup Malibou pillugu immikkut ilisimasalia timmisartortartoq Joe Caseyp eqqaavaa.

Nunami immamilu ajornartoornermi minneq assigiinngilluinnartut Joe Casey oqarpoq.

- Timmisartoq immamut mikkiartornerani timmisartup assakaasui atunnginnissaat pingaaruteqarput, taamaanngippat imaanut minniarnermini attuunnerani assakarsinnaammat. Aamma mallit anorilu malillugit minnermi aalannginnerunissaq anguniarlugu minnissaq pingaaruteqarpoq.

Timmisartortartoq eqqortumik iliorpoq

Joe Caseyp videoliaq timmisartumi Challengerimi inuttanit immiunneqartoq takusimavaa, maluginiarlugulu timmisartoq imaani suli puttasoq timitaalu ajoquserneqarani.

Timmisartortartoq eqqortumik iliorpoq Casey oqarpoq.

Joe Casey Davis Strædi 85-eriarlugu aqqusaarlugu timmisartorsimavoq, erseqqissarlugulu tassani pissutsit ajornerpaaffissaannut piareersimanissaq pingaaruteqarluinnartoq.

- Imaq nillertorujussuuvoq piffissamilu sivikitsuinnarmi uumaffigineqarsinnaalluni. Ajunngitsumik annaassiniuteqarpasippoq — annaassiniutaannartuunngilaq, kisianni timmisartumiit narlusuummut nakkartinneqaruni ingerlaannaq pullassinnaasumik. Soorunami timmisartumi pinnani silami atorneqassaaq.

Atallaarsuit annanniutit

- Aamma pingaaruteqarpoq timmisartumi ilaasut marluk ajunaalernermi milernerminni atallaarsuarnik annanniuteqarnissaat. Timmisartumi atallaarsuaqarnissaq oqorpallaarpoq, Piper Maliboumili ajornartoortoqartillugu atineqarsinnaasumik inissaqanngilaq, taamaattumik taanna atorlugu timmisartortariaqarpoq. Nammineq timmisartoraangami atortarpakka, ingerlaartillungali timitai peeqqasarlugit.

Joe Caseyp sooq timmisartup motooria unittoornersoq eqqoriarusunngilaa, oqarporli timmisartup ajutoorluni missinnaaneranut ilaasullu marluk annaanneqarnerannut silaginnera pissutaasoq, Issittumi Sakkutooqarfiup sumiiffimmut apuutipallannera timmisartortartullu iliuutsiminik ilisimanninnera.

Tyskit taakku marluk silarsuarmi timmisartunik takutitsinerit annersaannit, Airventuremit, ukiut tamaasa USA-p avannaata kangiani Oshkoshimi Wisconsinimiittumi Tasersuarpassuit eqqaanni ingerlanneqartartumit angerlamukaartillutik ajutoorput.

Piper PA-46 Malibu timmisartuuvoq motorilik, arfinilinnik ilaasoqarsinnaasoq 1979-imiilli sananeqartalersimasoq.