Timmisartumut ilaanissamut
akit minutsimiit minutsimut allanngorangajattarput –
timmisartumullu ilaanissamut billetimik ujarlernermi
aallussilluartoqartariaqarpoq, timmisartortitseqatigiiffimmi
neqeroorutaat imminnut sanillersuukkuminaattarput.
Tamanna
Sermitsiap sapaatit akunnerani uani nalaatsornikkut toqqaalluni
misissuinerata takutippaa. Kalaallit Nunaanniit Danmarkimut
uterlugulu akit taamaaliornitsinni paasivagut.
Timmisartumut ilaanissamut
akit minutsimiit minutsimut allanngorangajattarput –
timmisartumullu ilaanissamut billetimik ujarlernermi
aallussilluartoqartariaqarpoq, timmisartortitseqatigiiffimmi
neqeroorutaat imminnut sanillersuukkuminaattarput.
Tamanna
Sermitsiap sapaatit akunnerani uani nalaatsornikkut toqqaalluni
misissuinerata takutippaa. Kalaallit Nunaanniit Danmarkimut
uterlugulu akit taamaaliornitsinni paasivagut.
Nalaatsornikkut
toqqaalluni misissuinerup ataasinngornermi ulloq 14. juli Danmarkimut
ullullu arfineq-marluk qaangiunneranni uternissamut billetip akiisa
akikinnermit 6.096 koruunit, Aarhusimi angalatitseqatigiiffiup Ruby
Rejserimi pisiap, assinganillu Air Greenlandimi Tuukkakkut
angalanerup akikinnerup 12.106 koruunit akornanni nikerarput.
Akit
imaasiallaannarlugit sanillersuunneqarsinnaanngillat, internetikkummi
billetersigaanni atugassarititaasut sullissinerlu
assigiinngitsorujussuupput.
Nassataqarneq
nassataqannginnerluunniit
Assersuutigalugu
Air Greenlandip akigititaani tamatigut timmisartortitseqatigiiffiup
sullissineri ilaatinneqartarput, tassanilu angalanermi nerisat,
nassatat tigumiat kiisalu nassatat tunniussat 20 kiilut ilaasarput,
akerlianilli Ruby Rejserimi SAS-imilu akini nassatat tunniussat
ilaatinneqarneq ajorput – tassa angalanerpiap akia kisimi
ilaatinneqartarpoq.
Air
Greenlandillu Ruby Rejserillu Nuup Aalborgillu akornanni codesharemik
suleqatigiinnertut taaneqartumik ingerlatsinerat eqqumeequtaalaarpoq.
Taamaammallu timmisartoq taannarpiaq timmisartortitseqatigiiffiit
marluk taakku billetinik tuniniaaffigisarpaat – akilli
tunngavissarititallu assigiinngiinnartarput.
Ullunili
allani akinik ujarlernermi akit appasinnerullutilluunniit
qaffasinnerusinnaasarnerat erseqqissaatigineqassaaq – ingammik
piffissaqarluarluni inniminniigaanni. Sioqqutsilluni inniminniigaanni
timmisartumut ilaanerup akiata appasinnerusarnera ileqquuvoq.
Ataasinngornermi
ullaap tungaani akit maanna atuuttut quppernermi uani skemami
takuneqarsinnaapput.
Timmisartortitseqatigiiffinni assigiinngitsuni akit assigiinngitsorujussuusinnaapput – aamma billetit timmisartumut ataatsimut atuukkaluarpataluunniit.
Assi: Leiff Josefsen
Akit
nikerartut
Timmisartumik
ilaanissamut akit minutsimiit minutsimut allanngorarsinnaapput.
Timmisartortitseqatigiiffiit tamarmik akit nikerartut atortarpaat,
taakkullu aallarfissami aalajangersimasumi piumanninnerup
annertussusia ersersittarpaat.
Timmisartuussisarnerit
unammilleqatigiiffiulernerisa kingorna timmisartortitseqatigiiffiit
akunneranni unammilleqatigiinneq sakkortunerulerpoq, tamatumalu
kinguneranik ilaatigut timmisartortitseqatigiiffiit akikitsumik
timmisartuussisut, soorlu Norwegian aamma Ryanair pilerput.
Taamani
politikerit Nuummi nutaamik mittarfiliortoqarnissaanik
aalajangeramik, mittarfik unammillernerulernermik, taamaalillunilu
akinik appasinnerusunik malitseqassasoq naatsorsuutigaat. Kalaallit
Nunatsinni SAS-p Ruby Rejserillu akornanni aasaanerani aqqutini
unammillerneq annertunerusoq nalaapparput.
Siusinnerusukkut
pisisarneq ajornannginneruvoq, aammali akisuneruvoq. Nikerartumik
akinik inissiisarneq internetimi atuuttoq, internetip atugaalernerani
1990-ikkullu naanerani timmisartortitseqatigiiffiit
unammilleqatigiilernerini pilerpoq. Tamanna sioqqullugu timmisartumut
ilaanermut akit aalajangersimasuupput. Taamanikkut billetit
timmisartortitseqatigiiffiit sinnerlugit angalatitseqatigiiffinnit
tunineqartarnerat – angalatitseqatigiiffiillu taamaalillutik akip
ilaannik annikitsumik pissarsisarnerat nalinginnaasuuvoq.
Akit
aalajangersimasuupput – akikilliliivigineqarnissamullu
periarfissatuaq tassaasarpoq Apeximik billetit, tassani
sivikinnerpaamik ulluni 14-ini angalanissaq taamatullu aallarnermut
uternermullu inniminniinerup ataatsikkut pisarnissaa
piumasaqaataasarpoq.
Akinik
sanillersuussisartut atornaveersaakkit
Internetip
siaruaannerata kinguneranik maanna timmisartumut ilaanissamut
billetit timmisartortitseqatigiiffinni, angalatitseqatigiffinni
akinillu sanillersuussisartuni amerlasuuni, soorlu Expediami,
flybillet.dk-mi Travellinkimilu pisiarineqarsinnaalerput. Aamma
taakkunani billetini ataasiakkaani atugassarititat assigiinngillat –
sianiinaarneqassanngikkaannilu misissuilluartoqartariaqarpoq.
Danskit
atuisunut siunnersuisooqatigiivisa Forbrugerrådet Tænkip
timmisartunut billetit akinik sanillersuussisartuni pisiarinissaat
kaammattuutiginngilaa, taarsiullugulu timmisartortitseqatigiiffinnit
toqqaannartumik pisiarineqartarnissaat innersuussutigalugu.
-
Sanillersuussivinni timmisartumut billetsersigaangavit, taava
assersuutigalugu timmisartoq ilaaffissat taamaatippat kiap
akisussaaneranik ajornartorsiutip pilersinnaanera
eqqumaffigisassavat. Suliffeqarfiit imminnut pisuuteqattaattut marluk
akornanniileratarsinnaavutit, pisinnaatitaaffivillu
naammassiniarnerat piffissami sivisuumi pisinnaavoq, Vibeke Myrtue
Jensen, Forbrugerrådet Tænkimi seniorrådgiver oqarpoq. -
Akinik sanillersuussiviit angalanissanik ujarlernerni
isumassarsiorfittut annertunerusumik atussagitit, billetillu
timmisartortitseqatigiiffinni toqqaannartumik pisiarisassagitit,
Forbrugerrådet Tænkip kaammattuutigaa. Taamaalillutit angalaninni
ajornartorsiummik pilertoqarnerani pisarissersuinissaq
pinngitsoortissavat, Vibeke Myrtue Jensen siunnersuivoq.
Timmisartorluni feeriarnissami ilisimasariaqakkat
Billetit ataatsimut
pisiarikkit
Arlaannut
aqqusaassaguit timmisartumullu billetit ataatsimut pisiarisimallugit,
taava timmisartup siullip kinguaattoornera pissutigalugu
ingerlaqqiffissannik angumersinnginninni tuniniaasup
ikiortussaavaatit. Billetit assigiinngitsunik inniminniinerni
normoqarpata (reservationsnormu) ikiorneqarnissannik
pisinnaatitaanngilatit.
Akinik
sanillersuussiviit ilaatigooriarlutik timmisartortitseqatigiiffinnit
akikinnerusunik billetinik tuniniaasarput, tassanilu akinik
sanillersuussiviit timmisartumik billetinik
timmisartortitseqatigiiffimmit ataatsimit arlalinnilluunniit
assigiinngitsunit katiterisarnerat patsisaavoq.
Kreditkortit
atorlugu timmisartumut billetinik pisisarit
Nunat
tamat akornanni kreditkortit soorlu Visa, MasterCard imaluunniit
American Express nalinginnaasumik korti atorlugu billetimik pisininni
angalanermi sillimmateqartarput. Tamatumanili kortimik qanoq ittumik
peqarnersutit apeqqutaasarpoq.
Akiliinermi
kortini assigiinngitsuni iluaqutit suut ilaatinneqarnerat
aningaaseriviit aalajangertarpaat. Taamaammat kreditkortinnut
angalanermik sillimmammik ilaatitsisoqarnersoq, sillimmatillu suut
matussusertarnerai pillugit aningaaseriviit paasiniaaffigiuk.
Saniatigut akisuumik angalanermi sillimammik pisinissat
sipaarsinnaavat.
Akiliinnginninni
timmisartumut billetit misissorluaruk
Timmisartumut
billetimik pisiguit billetit utertissinnaanngilat, aallaavittullu
aamma angalanissat allanngortissinnaanngilatit. Taamaammat ullut
kukkusut atilluunniit kukkusumik allannerata allanngortinniarnera
akisulluniluunniit ajornartorujussuusinnaavoq – immaqalumi
ajornavissinnaalluni. Timmisartortitseqatigiiffiilli ilaasa
pisinermit nalunaaquttap akunneri 24-t angullugit
peqqissimisinnaaninnik periarfissaqartissinnaavaatit.
Billetip
pisarinnginnerani tamatigut makku misissortassavatit:
Ornitassat
eqqortuusoq
Ateq
eqqortumik allassimasoq
Passit
normui eqqortuusut
Ullut
eqqortuusut
Inernerani
akip neriorsuutaasumut naapertuunnera
Immikkut
kissaataasinnaasut allassimanerat
Saniatigut
pisiavit – soorlu nissunut inissaq issiaffissarluunniit –
pisianni allassimanera
Timmisartumut
billetinni kukkuneqarpa? Taava sapinngisamik piaarnerpaamik
billetsisiviit attavigissavatit. Pisineq naammassineqarpat, taava
timmisartumut billetimi allassimasut akuerisimavatit.
Tigulaariffik:
Forbrugerrådet Tænk – taenk.dk
Imaasiorpugut
Akit
tamarmik timmisartortitseqatigiiffiit namminneq nittartakkakkut
qupperneranni juulip 14-iani ullaap tungaa pissarsiarineqarput.
Aallarnermi uternermilu akinneq ujarneqarpoq – tassani ullunik
allannguinerni malittarisassani piumasaqaatinilu allani killiliinerit
apeqqutaatinnagit. Ulloq aallarfik sapaatip akunnerata qiteqqunnerani
pivioq, uterfissarlu sapaatip akunnerata qaangiunneraniilluni.
Malugiuk,
SAS-imi Ruby Rejserimilu akini nassatat tunniussat ilaanngimmata –
Ruby Rejserimulu tunngatillugu timmisartornermi nerisat
ilaanngimmata. Nerisat inniminniinermi pisiarineqartussaapput.
Ruby
Rejser angalanermi ataatsimi nassatanik 15 kiilunik tunniussinermi 99
kr-inik akeqartitsivoq. SAS nassatamik tigummiamik 8 kiilumik,
nassatamillu tunniussamik 23 kiilumik angalanermi ataatsimi 200
koruuninik akeqartitsivoq.
Akinut
assersuutinittaaq timmisartortitsisut assigiinngitsut timmisartunik
assigiinngitsunik atuinerat isiginiarneqanngilaq, tassani issiaviit
pitsaassusaat, nissunullu inissap annertussusaa timmisartullu iluani
inissat assigiinngissinnaasarput.
