Timmisartuussinissamik taamaatitsinerit: Nammineq unnuiffissaqartut unnuillik
Silap ajornera silaannarmi angallassinnissamut eqquivoq. Ingammik Ilulissani angalasunut tamanna malugineqarsinnaavoq. Timmisartuussinerit arlallit ataasinngornermi juulip 7-ani pisussaagaluit aamma taamaatinneqarput. Ilulissanilu maannakkut siniffissat amerlanngillat.
Foto: Oscar Scott Carl
Nuna tamakkerlugu angalasussarpassuit uninngapput.
Aamma aqagu, taama Air Greenland nalunaarpoq.
- Aqagu ataasinngornermi juulip 7-ani silassaq naapertorlugu silaannaq suli sakkortuumik anorlersinnaavoq, Nuummit Nuummullu timmisartuussisoqarsinnaajunnaarluni.
- Taamaattumik angalasussarpassuugaluit taamaatiinnarneqassapput, isumalluarpugulli Ilulissat, Qaarsut, Sisimiut Kujataanilu angallannerit ingerlanneqassasut, soorluttaaq GL743 Københavnimiit Nuummut aqagu apuussinnaassasoq, Kangerlussuaq minngitsoorfimmi sillimmataassalluni.
Atlantikoq qulaallugu marlunngornermi pingasunngornermilu ingerlanneqarnissaanut sapinngisamik ilaasussanik amerlanerpaanik Air Greenlandip immerniarsaraa. Nunatsinni angallanerit aamma annertusivaat, taamaakkaluartorli sapaatip-akunnerata naanerani aatsaat ilaasut eqqugaasut tamakkerlugit apuussinnaassallugit naatsorsuutigaat.
- Timmisartut sinneri Air Greenlandip Operations Control Centeriani marlunngorpat juulip arfineq-pingajuani aallartinneqartussatut piareersarneqarput, Pre Flight Planningillu taakku tunngavigalugit angalanissamut pilersaarutinik nutaanik suliaqarnerani piffissaq sivisulaartoq atorneqassaaq.
Ilulissani unnuiffissaqarpianngitsoq
Ilulissani unnuiffissat amigaatigineqarput, taamaattumik Air Greenland kaammattuivoq nammineq unnuiffissallit periarfissaq atoqqullugu.
- Nuummi Ilulissanilu nammineq unnuiffissaqartut tamaasa kajumissaarpavut periarfissaq taanna atorluartaqqullugu, Ilulissanimi maannakkut siniffissat amerlanngimmata.
- Taamaattumik kajumissaarpatsigit siniffissamik pisariaqartitsinngikkuit mailikkut uunga nalunaarfigeqqullugit: nyhed@airgreenland.gl – UKU paasissutissat allassapput: Booking normua, aqqit, illoqarfillu sumi sapernunersutit.
Naammagittartoqarnissaa neriuutigineqartoq
- Sulisut tamaviaarlutik inissiinissaminnik ulappupput taamaammat ilaasunut eqqugaasunut naammagittarnissaq pingaaruteqarpoq, taamaatitsinerit amerlammata sivisulaarsinnaavoq pilersaarutit nutaat, siniffissaq, nerisassat angallannerlu pillugit paasissutissat piareerneqarnissaat.
Air Greenlandip nittartagaani paasissutissat kingulliit malinnaaffigisinnaavatit.
