Timmissat toqungasut nassaarineqartut – Timmissanut nualluut pasitsaanneqarpoq
Tunup sineriaani arlalinni ingammik Ittoqqortoormiip eqqaani appaliarsuit toqusimasut pillugit innuttaasut piffissami kingullermi nalunaaruteqartarput. Timmissat akornanni timmissanut nualluut napparsimalersitsisimanissaa toqussutigineqarsimanissaalu pasitsaassimaneqarpoq, tamannali maannakkut suli uppernarsarneqanngilaq, Aalisarnermut Piniarnermullu Naalakkersuisoqarfik ilisimatitsivoq.
Foto: Leiff Josefsen
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, Aalisarnermut Piniarnermullu Naalakkersuisoqarfik aamma Pinngortitaleriffik suleqatigalugit timmissanik napparsimasorisanik katersineq misissuinerillu aallartinneqarput.
Oqartussat ilisimatitsipput timmissat nappaataat siornatigut Kalaallit Nunaanni paasineqarsimasoq pissutaasinnaasoq, tamannali suli uppernarsineqanngilaq:
- Siornatigut Kalaallit Nunaanni timmissat nualluutaat sakkortuumik tuniluuttartoq napparsimatitsisartorlu (Aviær influenza) uppernarsarneqarsimavoq, aammalu maanna pasitsaassimaneqarpoq timmissat akornanni timmissanut nualluut napparsimalersitsisimasoq toqussutigineqarsimasorlu. Kisianni tamanna maannakkut uppernarsarneqarsimanngilaq, Aalisarnermut Piniarnermullu Naalakkersuisoqarfik allappoq.
Mianersoqqussut
Timmissat nualluutaannik tunillatsissimasunit inuit timmissanit tunillatsissinnaapput, tamassumali ilimanassusaa annikippoq.
Inuillu virusimik tunillanneqarsimasut napparsimarujussualertarnerat qaqutigoortuusoq, Naalakkersuisoqarfik ilisimatitsivoq.
Timmissat qanillisimatillugit timmissat nualluutaat nalinginnaasumik qaqutiguinnaq inunnut tuniluuttarpoq.
Timmissanik passussinerit pillugu imminut illersornissamut malitassat ataani allassimasut malinneqassasut kaammattuutigineqarpoq:
- Qaqorsaaserlutit errortorit, pingaartumik timmissat erlaviinik peersisimaguit.
- Timmissat erisarnagit amiikkit (pujoralatserinnginneruvoq).
Neqit manniillu nualluummik virusitaqarunik ooqqissunngorlugit siallugit/qalallugit virusertaa toqunneqartarpoq.
Timmissat toquinnarsimasut oqartussanik isumaqatigiissuteqareernikkut taamaallaat passunneqartariaqarput.
Pinngortitami timmissanik toqungasunik nassaaraanni UMIO-mut uumasut@nanoq.gl-imut imaluunniit 34 50 00-imut ammasarfiup iluani, tassa ataasinngorneq, marlunngorneq, sisamanngorneq tallimanngornerlu nal. 9.00-miit 15.00-ip tungaanut saaffiginnittoqarsinnaavoq.
Pinartoqartillugu Uumasut nakorsaat Stella Ege Kristensen saaffigineqarsinnaavoq oqarasuaat 345390.
