Titartaasartoq taalliortorlu inuusuttoq kulturikkut nersornaaserneqartut

Naalakkersuisut pisarneq malillugu inuiattut ullorsiornermi kulturikkut nersornaasiipput.

Titartaasartoq eqqumiitsuliortorlu Nuka K. Godtfredsen ukioq manna kulturikkut nersornaaserneqarpoq. Kultureqarnermut naalakkersuisup Aqqaluaq B. Egedep (IA) Nuummi kulturip illorsuani Katuami tamanna nalunaarutigaa.

Nuka K. Godtfredsen ukiorpassuarni eqqumiitsuliortuusimavoq.

Aviisimi Sermitsiami saqqummersinneqartartumik Andala pillugu 1997-imiit 2001-imut titartaasarpoq. Aamma atuakkanut frimærkinullu assilialiortarluni.

Nuka K. Godtfredsenip titartaanermik ilinniartitsisarnera naalakkersuisup ilaatigut eqqaavaa:

- Maluginiarneqarpoq meeqqanut inuusuttunullu titartaanermut sammisitsisarsimaneratigut inuusuttut titartaanermik piginnaasaqartut ikiterneqartarneri, Aqqaluaq B. Egede oqarpoq.

Pingasunik ukioqarluni iikkamut titartaasoq

Eqqumiitsuliortoq qujassuteqarnermini arni qutsavigaa:

- Siullermik anaanamut qujarujussuarusuppunga. Pingasunik ukioqarlunga iigarujussuaq tuschimik titartarsimagakku.

- Eqqaamangaarakku taanna titartagara qanoq kusanartigisoq, taamaattumik ataatamit taamani naveersinngitsoorpunga. Taamanili paasivara titartaallaqqissorujussuullunga, Nuka K. Godtfredsen Katuami oqarpoq. Taassuma qatanngunni aamma qutsavigaa:

- Kim-mi aamma qujanarujorujussuaq tapersersuisarassi. Ataata eqqaanngitsoorsinnaangilara. Ataatatut perorsarnikuuaatigut sulisinnaanngorluta, oqartarami: ”Piginnaanersi taanna upperissavarsi, aallullugu”. Taamaammat suli ingerlajuarpugut.

Kajumissaarutit nersornaat inuusuttunut erinarsortartumut

Naalakkersuisoq kajumissaatitut aamma nersornaasiipput, taannalu  erinarsortartumut taalliortumullu Heidinnguaq Jensenimut tunniunneqarpoq.

Erinarsuusia ilai 2023-mi saqqummersitami "Uummannarmiuaqqat"-mi saqqummersinneqarput. Taanna Uummannami meeqqat angerlarsimaffiannit saqqummersitaavoq.

- Eqqumiitsuliortutut piginnaasalittut ineriartornera maluginiarneqartarpoq. Kiffaanngissuseqarnermut, maqaasinermut, annilaaganermut, oqimaatsunik nanertuuteqarnermut aamma inuunermit ajornartorsiorfimmit qaangiiniarnermut erinarsuusiai ilaatigut tunngassuteqarput,  Aqqaluaq B. Egede taalliortoq pillugu oqarpoq. Kajumissaammik tunineqartoq qujassuteqarniarluni oqaluttarfimmut qaqisoq attortisimaqaaq:

- Qujanaq taasimagassinga. Attortinnaq. Annertuumik attortisimavunga, Heidinnguaq Jensen oqarpoq, nangipporlu:

- Tapersersuinikunut tamanut qujanaq. Ilimaginngikkaluarakku tamaanga killissallunga. Minnerunngitsumik Ann Andreassen qujaffigerusuppara. Ann-eqanngitsuuppat taavalu nipilersoqatigisartakkakka tamaanga killissimanavianngikkaluarpunga. Qujanaq.