Tivoli Danmarkimi takornariarneqarnerpaat ilagaat
VisitDenmark naapertorlugu siorna Danmarkimut tikeraartut amerlassusaasa takutippaat „Danmarkimi misigisassarsiorneq soqutigineqarluartoq“.
Københavnimi Tivolimi Tivoligarden ataasinngornermi juunimi. Danmarkimi Tivoli takornariarneqarnerpaavoq. (Assiliisoq: Ida Marie Odgaard/Ritzau Scanpix)
Ida Marie Odgaard/Ritzau Scanpix
Siorna Danmarkimi takornarianit ornigarneqarnerpaat 50-it 22,5 millioninit takornariarfigineqarsimasut VisitDenmark-imit kisitsisit takutippaat.
Københavnimi Tivoli takornarianit 4 millioninit amerlanerulaartunit ornigarneqarnersaavoq.
Qulit siulliit 50-it akornanni 11,7 millionit inulaarlugit ornigarneqarsimapput, tassa takornariat affai sinnerlugit qulinut siullernut ilaapput.
Tulliuttutut inissippoq Dyrehavsbakken, Københavnimilu Uumasuusivik pingajuattut inissilluni.
VisitDenmarkimi misissuinermut pisortaq Charlotte Rømer Rassing naapertorlugu „Danmarkimi misigisassarsiornissaq soqutigineqarluartoq“ kisitsisit takutippaat.
- Danmarkimi sumiiffiit allarpassuit takornariassallugit piukkunnaateqarluarnerat takornariallu takornariarfissanut ukioq manna ilanngussatsinnut soqutiginninnerujartortut kisitsisit takutippaat.
- Siorna ornigarneqarnerpaat 50-it qiviaraanni, 2022-mut sanilliullugu 6,2 procentimik siuariarneruvoq, tusagassiuutinut nalunaarummi oqarpoq.
Siorna ornigaasut ukiunut siuliinut naleqqiunnissaat ajornakusoortuusoq aammattaaq erseqqissarpaa, ornigaasummi nalunaarsorsimaffiat allanngortinneqarsimammat, taamaattumik ornigaasut pisortatigoortumik nalunaarsorneqarsimasut kisimik ilanngunneqarsimapput.
Taamaattumik siornatigornit takornariarfissat ikinnerusut allattorsimaffianniipput.
- Ukioq mannali nalunaarsukkaniittuni 2022-mi 2023-milu qanoq amerlatigisut ornigaasimanersut takusinnaavarput, taamaattumik takusinnaavarput amerlasuut 2023-mi 2022-mut naleqqiullugit takornariarneqarnerusut.
- Paasissutissalli tunngaviusut assigiinngimmata ukiunut siuliinut sanilliullugu ineriartorneq nalinginnaasoq nalileruminaappoq, Charlotte Rømer Rassing oqarpoq.
Legoland aamma BonBon-Land aamma ilanngunneqarsimanngillat, taakkumi tamarmik kisitsisinik saqqummiussineq ajormata.
Parkit nuannaarniartarfiit ornigarneqarnerpaat qulit katillugit 7,8 millionit inorlugit ornigarneqarsimapput, katersugaasiviillu ornigarneqarnerpaat qulit 5,2 millionit inorlugit ornigarneqarsimallutik.
Takornariarfissat ornigarneqarnerpaat qulit ilaat pingasut ornigarneqarnerat appariarpoq. Assersuutigalugu Faarup Sommerlandip ornigarneqarnera ukiup siulianut sanilliullugu 13,5 procentimik appariarpoq.
/ritzau/
