KL

DK

Tjenestemandit suminngaanneernerat apeqqutaatillugu naligiinngitsumik atugassaqartinneqarput

Kalaallit Nunaanni Danmarkimiluunniit najugaqarneq apeqqutaalluni tjenestemandit qanoq soraarnerussutisiaqarsinnaanerat assigiinngissuteqarpoq. Assigiinngissuteqarnermut pissutaasut oqaluttuarisaanermi qulaajarneqarsinnaanersut Aningaasaqarnermut Naalakkersuisoqarfiup maanna misissorpaa.

Tjenestemandit atugaat pillugit qulaajaasoqassanersoq Naalakkersuisoqarfimmit maannakkut misissorneqartoq Aningaasaqarnermut Naalakkersuisoq Erik Jensen ilisimatitsivoq.
Tusagassiortoq
Saqqummersinneqarpoq

Tjenestemandinut immikkoortup qulaajaavigineqarnissaanik kissaat Aningaasaqarnermut Akileraartarnermullu Naalakkersuisup Erik Jensenip paasisinnaalluarpaa.

Paragraf 37 atorlugu Peter Olsenip apeqqutaanut Erik Jensenip akissutaani tamanna atuarneqarsinnaavoq.

Ukiuni tallimmani nalimmassaasoqanngitsoq

Danmarkimi tjenestemandit soraarnerussutisiaat 2019-imiilli qulingiluariarlutik nalimmassarneqarsimasut, piffissamili tassani maani nunatsinni tjenestemandit soraarnerussutisiaat sooq allanngorsimannginnerat Peter Olsenip ilaatigut apeqqutigaa.

- Kalaallit Nunaannili Danmarkimilu tjenestemandit aningaasarsiaat assigiinngillat, taamaammallu Danmarkimi tjenestemandit soraarnerit Kalaallit Nunaanni tjenestemanditut soraarnertulli assigiimmik soraarnerussutisiaqarneq ajorput. Taamattaarlu Kalaallit Nunaanni Danmarkimilu tjenestemandit soraarnerussutisiaat assigiinngitsumik ineriartortarput, akissummi ilaatigut taama allassimavoq.

- Kalaallilli Nunaanni tjenestemandit soraarnerussutisiaasa nalimmassarnerat Kalaallit Nunaanni tjenestemandit naalagaaffimmi, namminersorlutik oqartussani kommuninilu atorfeqartunut isumaqatiginninniarnerat naammassippata aatsaat pisinnaavoq. lsumaqatiginninniarnerit sivitsoruttoorneranni nalimmassaatit sivitsoruttoortarput. Taamaalillunilu Kalaallit Nunaanni tjenestemandit naalagaaffimmi atorfeqartut pillugit isumaqatiginninniarnerit sivitsoruttoorpoq. Taakku assersuutigalugu tassaapput pinerluuteqarsimanermi isumaginnittoqarfimmi politiinilu sulisut. Isumaqatiginninniarnerit taakku namminersorlutik oqartussanit ingerlanneqarnatik Danmarkimi finansministereqarfimmit ingerlanneqarnerat eqqumaffigissallugu pingaaruteqarpoq. Aningaasaqarnermut Sulisoqarnermullu Aqutsisoqarfiup tjenestemandinut soraarnerussutisianut nalimmassaatit aningaasartaat tiguniariarlugit, tjenestemandinut soraarnerussutisiat kingumoortumik piffissamullu isumaqatiginninniarfigineqartumut siumoortumik nalimmassaavigineqassapput, Erik Jensen allappoq, erseqqissaatigalugulu Naalakkersuisut aningaasarsianik atorfeqartitaanermullu atugassarititanik isumaqatiginninniarnernut politikikkut akulerussinnaanngitsut, taakkumi sulisartoqarnermi illuatungeriinniipput

Suliat annertoorujussuit

“Danmarkimi najugallit tjenestemandillu Kalaallit Nunaanni najugallit tamakkiisumik sanillersuukkumallugit, aningaasarsiat inissisimaffiinut atorfeqarnerillu sivisussusaat tamakkerlugit skalatrinit tamaasa naatsorsorneqaqqaartariaqarnissaat/qulaajaavigineqaqqaartariaqarnissaat” annertoorujussuarmik suliassaassasoq ilanngullugu paasissutissiissutigineqarpoq.

- Naatsorsuusiaq taanna tjenestemandinut assigiinngitsunik atorfilinnut tamanut, soorlu perorsaasunut, ilinniartitsisunut, inatsisilerituunut, allaffimmiunut, palasinut il.il. aamma naatsorsuusiorfigineqartariaqassaaq, Erik Jensenip oqaatigaa.

Kalaallit Nunaanni Danmarkimiluunniit najugaqarneq apeqqutaalluni assigiinngissuteqarnermut paragraf aalajangersimasoq pissutaavoq. Taannalu tassaavoq Kalaallit Nunaanni naalagaaffiup tjenestemandit atorfilittaanut il.il. soraarnerussutisiassanut inatsimmi nalunaarummi immikkoortoq 31-mi 2017-imeersumi ima allassimavoq:

“Tjenestemandi kap. 1 naapertorlugu suliunnaarnersiutitalimmik suliunnaarsitaanermi kingorna Kalaallit Nunaanniunngitsoq najugassikkuni, pisinnaatitaavoq nunami maani tjenestemanditut suliunnaarnersiutit pillugit inatsimmi malittarisassat naapertorlugit pissarsiarisimasinnaasami annertoqataannik suliunnaarnersiutinik tunineqassalluni. Taamattaaq pineqassapput aapparisaq qitornallu toqukkut qimatat. Suliunnaarnersiutinik naatsorsuineqassaaq inatsit manna naapertorlugu suliunnaarnissamut ukioqqortussuseq tunngavigalugu."

Nalunaarusiorsinnaanermik periarfissanik misissuineq

- Tjenestemandinut Kalaallit Nunaannit Danmarkimut nuuttunut soraarnerussutisiatut tunniunneqartut, danskit aningaasartaliussaat malillugit akilerneqartassasut aalajangersakkami aalajangersarneqarpoq. Aalajangersagaq taamaalilluni Kalaallit Nunaanni Danmarkimilu tjenestemandinut soraarnerussutit assigiinngissinnaanerannik takutitsivoq, Erik Jensen oqarpoq.

Tjenestemandit akissarsiaasa aamma soraarninngornissamut aningaasarsiaasa misissuiffigineqarnerannut tunngatillugu Erik Jensen ima paasissutissiivoq:

- Aningaasaqarnermut Akileraartarnermullu Naalakkersuisoqarfik maannakkorpiaq tjenestemandinut aaqqissuussinitta ilusilersorneqarneranut oqaluttuarisaanermi patsisaasorpiaat pillugit nalunaarusiorsinnaanermik periarfissanik misissuinera paasissutissiissutigissavara. Aaqqissuussaaneq Kalaallit Nunatsinni politikikkut aalajangikkanik takutitsisuinnaanngilaq, aammali qanga danskit naalagaaffiata kisimi Kalaallit Nunatsinni tjenestemandinik atorfinitsitsisartuunerata nalaani tjenestemandertatta pisinnaatitaaffinnik nassataannik takutitsisuuvoq.

- Taamaattoqassappat qulaajaaneq tjenestemandinut immikkoortumi allaffissornikkut periutsit saniatigut, danskit kalaallillu inatsisaannik misissuisussap pisariaqarnera ilimagineqartariaqassaaq. Taakku siusinnerusumut maannakkullu atuunnerat ilanngullugu. Taamatut misissuinerup avataanit ikiorserneqarnissat pisariaqalersissagaa ilimagineqarpoq. Taamaammallu tamatumunnga periarfissat misissorneqaleruttorput, Erik Jensenip akissuteqaatini naggaserpaa.

tjenestemandspensioner inuiaqatigiit tjenestemandsområdet samfund

ATORFIIT Se alle jobs

Powered by Labrador CMS