KL

DK

Toqqaannartumik folketingimi kalaallisut nutserisoqartalissaaq

Folketingi nutserisunut bokseqalissaaq, oqaluttarfimmiit kalaallisut oqaluttoqartillugu danskisuunngortitsilluni nutserisoqartalissammat.

Aki-Matilda Høegh-Dam (S) Folketingimi kalaallisut oqalussinnaanini attatiinnarniarlugu aalajangiusimavoq, maannalu Folketingi aalajangersimasunik oqallinnerni toqqaannartumik nutserisoqarsinnaalissaaq.
Ritzaus Bureau
Saqqummersinneqarpoq

Sivitsortumik ilaatigullu akerleriissutaasartumik piffissaq atorneqareersorlu tamatuma malitsigisaanik Folketingip maanna aalajangerpaa oqallinnerni aalajangersimasuni Folketingip ataatsimiittarfiani toqqaannartumik nutserisoqartalissasoq.

Taamaalilluni kalaallit folketingimi ilaasortat oqalugiaataat apeqqutaallu toqqaannartumik nutserneqarsinnaalissapput.

Folketingip siulittaasoqarfia tusagassiorfinnut nalunaaruteqarluni taamak nalunaaruteqarpoq.

Siulittaasoq Søren Gade naatsorsuutiginnippoq, aalajangiineq nutaaq unammilligassarpassuaqassasoq.

- Naatsorsuutigaarput unammilligassaqassasoq kalaallisut danskisullu ataatsikkut nutserinermik qaffasissumik pitsaassuseqarluartumik inerisaanissaq, taanna  nalunaarummi oqarpoq.

Siulittaasoqarfik siusinnerusukkut itigartitsisimavoq toqqaannartumik nutserisoqartalernissaanut, aningaasartuutaasorujussuusinnaanera innersuussutigineqarluni.

Oqallinnerit arlallit nutserneqassapput

Taamaakkaluartoq tamanna Aki-Matilda Høegh-Damimit isornartorsiorneqarpoq, taanna kalaallisut oqalugiarnissaminik piumasaqartuarpoq.

Folketingip ammaanersiorluni oqallinnerani pisoqarpoq, tassanilu oqalugiaammut tunngatillugu apeqquteqartoqarsinnaatitsisoqanngilaq, oqalugiaat kalaallisut ingerlanneqarmat nutserneqarsimananilu.

Folketingi kingusinnerusukkut novembarip 26-ani oqallinnermi periarfissat misilerarpai.

Maanna aaqqissuussaq atuutilerpoq, taamaattumik ukiumut "oqaluuserisassani aalajangersimasuni" oqallinnerni nutserisoqartassaaq, naalagaaffeqatigiinnermut immikkut pingaaruteqartuni - assersuutigalugu Issittumi nalunaarusiaq pillugu oqallinnermi.

Taamaalillutik Folketingimi kalaallit ilaasortat folketingip ataatsimiittarfiani oqallinnerni arlalinni isumaqatigiinniarnernilusiumoortumik qinnutigineqareersimallutik piareersimaffigineqartuni nutserinissamik qinnuteqarsinnaapput, Præsidiumimit oqaatigineqarpoq.

- Siulittaasoqarfimmi amerlanerussuteqartut piviusunngortinneqarsinnaasumik ilusilersuinissamik toqqaasimanerat nuannaarutigaara. Folketingimi kalaallisut oqalussinnaanissamik kissaateqarneq tusarnaarparput, kisianni aamma eqqortumik suliarissavarput pisussaaffitsinnullu naammassinnilluta, Søren Gade nalunaarummi oqarpoq.

DD sinnerlugu ilaasortaq: Akisullunilu ajornakusoortoq

Folketingip Præsidiumiani ilaasortat akornanni kisiartaalluni aalajangernermut tapersiinngitsoq tassaavoq Danmarksdemokraterne sinnerlugu ilaasortaq, Karina Adsbøl.

- Paasisinnaanngilluinnarpara, sooq tamanna pisariaqarnersoq, taanna oqarpoq.

- Danskit oqaasiisa saniatigut allamiutut oqalussinnaanermik aalajangerneq akisoorujussuusussaavoq, aamma misilerarneqarnerani ersersinneqareerpoq annertuumik pisarissersuisoqartoq.

Atortorissaarutit nutaat aaqqissuussinermut tassunga pisariaqartinneqassapput.

Folketingi taamaattumik tolkeboksinik atortorissaarutinillu sanasoqassaaq.

Folketingip siulittaasoqarfiata naatsorsuutigaa, oqalutsit boksiinut atortorissaarutinullu aningaasartuutit ukiumut 3,5 millionit koruuninik naleqassasut, taamauttaaq nutserisussat sisamat aalajangersimasumik atorfinitsinneqarnissaannut.

Tassunga ilanngullugit tolkeboksinut sanaartornissamut atortorissaarutinullu ikkussuinissamut aningaasartuutit 5 millionit koruuniussasut missiliorneqarpoq.

Atortorissaarutit 2025-imi atuutilissapput.

/ritzau/

inuiaqatigiit grønlandske folketingsmedlemmer folketinget aki-matilda høegh-dam søren gade simultantolkning samfund

ATORFIIT Se alle jobs

Powered by Labrador CMS