Toqusup timaanik misissuineq pinerluttoqarsimaneranik takussutissaqanngitsoq
Angutip toqungasup Nuup eqqaani Kangerluarsunnguup imartaani sapaatiummat nassaarineqartup timaa misissorneqarpoq. Politiit ullormi kingullermi imigassartorsimasunut suliat arlallit aamma aallartippaat.
Assi: Oscar Scott Carl
Angut 32-nik ukiulik toqungasoq Kangerluarsunnguami pisuttuartunit sapaatiummat nassaarineqartoq pillugu nutaanik paasissutissaqarpoq.
Toqusup timaanik misissueqqissaartoqarsimasoq pigaartut pisortaat Aputsiaq Hansen sisamanngornermi ullaakkut paasissutissiivoq:
- Pasitsaassaqanngitsoq paasineqarpoq, taamaattumik maannamut pinerluttuliornermut takussutissaqanngilaq, Aputsiaq Hansen oqarpoq.
Angutilli 32-nik ukiullip nassaarineqarnissi sioqqullugu sumiissimaneranik ilisimannittut politiit oqaloqatigerusuppaat, tassungalu atatillugu angutip aqqa assigaalu Facebookimi quppernerminni saqqummiullugu.
Imigassartorsimasunut suliat arlallit
Politiit ullormi kingullermi sumiiffinni arlalinni imigassartorsimanermik tunngassuteqartunik suliaqarput.
Politiit ilaatigut aqqusinermi eqqissiviilliornerit pingasut, aalakoorpallaartut pingasut, angerlarsimaffinni eqqissiviilliornerit sisamat kiisalu angerlarsimaffimmi meerartalimmi eqqissiviilliorneq ataaseq orniguffigineqarsimasoq pigaartut pisortaat oqarpoq.
Aamma nakuusernerit pingasut nalunaarutigineqarput, politiillu taakku pillugit katillugit sisamanik sulianik aallartitsillutik.
- Nakuusernermut suliami ataatsimi Sisimiuni tigusaqarpugut. Nakuusernermut tunngasut suliat marluk aallartippavut, pineqartumullu ataatsimut tamatumunnga tunngasunik allanik suliaqarnerput pissutigalugu eqqartuussivimmut sassartinneqassanerluni aalajangiiffigissavarput, Aputsiaq Hansen oqarpoq.
