Trump: Charlie Kirkimik toqutsisimasutut pasineqartoq tigusarineqarpoq

Konservativimik Charlie Kirkimik aallaammik aallaannittoqarneranut atatillugu USA-mi politiit angut tigusaraat.

Præsidenti Donald Trump Amerikami tv-qarfimmut Fox Newsimut apersorneqarluni Taama oqarpoq.

- Eqqortoq tigusarisimagipput isumaqarpunga. Qanigisaata oqaatigaa.

- Inuk ujagarput tigusarisimagipput isumaqarpunga, Trump oqarpoq.

Tigusaasup ataataa tigusaanissaanut ikiuuppoq, Trump aamma oqarpoq.

Angut 22-nik ukiulik

Pasineqartoq tassaasoq Tyler Robinson 22-nik ukiulik Utahimeersoq tusagassiuutit arlallit — ilaatigut nutaarsiassaqartitsivik Reuters — paasisimavaat.

Reuters misissuinermut attuumassuteqartunit marlunnit taamatut paasitinneqarpoq.

Paasissutissaq tamanna FBI-mit Amerikamiluunniit oqartussaasunit allanit uppernarsarneqarsimanngilaq.

FBI najukkamilu oqartussat tallimanngornermi ualikkut pisimasoq pillugu tusagassiortunik katersortitsissapput. Danskit nalunaaqutaat malillugu ualikkut pingasunut aallartittussaagaluarpoq, kinguartinneqarporli.

Charlie Kirk 31-nik ukiulik Donald Trumpimik tapersersuisutut ilisimaneqartoq, universitetimi Utah Valleymiittumi pingasunngornermi oqallittoqarnerani aallaaneqarpoq.

Qoorortooq orpippassuarni nassaarineqartoq

Tassani inunnut 3000-it missaanniittunut oqalugiartilluni takunnittut naapertorlugit qungatsimigut aallaaneqarpoq.

Napparsimmaviliaanneqarpoq, tassanilu toquvoq.

Tamatuma kingorna USA-mi oqartussat assit videoliallu isumannaallisaanermi assiliivinnit assilisat saqqummiuppaat, tassani angut inuusuttoq taartunik atisalik illup qaavani oqalliffiup eqqaaniittoq takuneqarsinnaavoq.

FBI naapertorlugu aallaasersortup qoorortooq sakkortooq atorsimavaa, taannalu sisamanngornermi orpippassuarni nassaarineqarpoq.

Donald Trumpip toqutsisup toqumik pillarneqarnissaa kissaatigalugu aallaasersortoqarnerata kinguninngua oqarpoq.

Tamanna tallimanngornermi Fox Newsimut oqaatigeqqippaa.

/ritzau/