Trump Indiamut akitsuutinik 25 procentimik qaffaavoq
Akitsuutit qaffanneqarnerannut pissutaavoq, Trumpip oqarnera naapertorlugu, Indien "toqqaannartumik imaluunniit toqqaannanngitsumik Ruslandimiit uuliamik pisiniartarmat".
Assimi takuneqarsinnaavoq Indiami ministeriunerusoq Narendra Modi aamma USA-p præsidentia Donald Trump Modi-p Washingtonimi illorsuarmi qaqprtumi februaarip 13-iani 2025-imi pulaarneraneersoq.
Asseq (Toqqorsivimmit) Kevin Lamarque/Reuters/Ritzau Scanpix
USA-p præsidentia, Donald Trump, Indiamit nioqqutissanut akitsuutinik 25 procentimik qaffaaqqippoq.
Tamanna Trumpip præsidentitut peqqusinerani nalunaarutigineqarpoq.
Akitsuutit qaffanneqarneranut pissutaavoq, Trumpip oqarnera naapertorlugu "Indiap toqqaannartumik imaluunniit toqqaannanngitsumik Ruslandimit uuliamik pisiniartarnera".
Taamaalilluni Trumpip akitsuutinik qaffaanissamik Indiamut sioorasaarutigisimasani piviusunngortippaa Ruslandimut attaveqarnerminik niueqateqarnerminillu ingerlatsiinnarnera pillugu.
Akitsuutit qaffanneqarnerat ullut 21-t qaangiuppata atuutilissaaq.
Taamaattorli peqqussummi nalunaarutigineqartumi ilanngullugu nalunaarutigineqarpoq, politikkikkut pissutsit allannguuteqassappata, akitsuutit qaffanneqarnerat aamma allanngortinneqarsinnaasoq.
Akitsuutit qaffanneqartut Trumpip Truth Socialimi juulip naanerani nalunaarutigisimasaanut 25 procentimik akitsuutinut ilanngunneqassapput, taakkualu, tassa akitsuutit siulliit sisamanngornermi atuutilissapput.
Akitsuutinik qaffaanissap qaavatigut qaffaanissamik Trumpip nalunaarutigaa, Indiamiut Ruslandimit sakkunik orsussanillu pisinermut sakkortunerusumik akitsuutinik qaffaasoqassasoq - kisianni taamani erseqqissumik nalunaaruteqarani qanoq annertutigisumik akitsuuseeqqittoqassanersoq.
Nutaarsiassaqartitsivik AFP naapertorlugu ullumikkut akitsuutit qaffanneqartut nioqqutissanut immikkut akitsuuteqarnermut ilanngunneqanngitsunut, soorlu saviminernut aluminiummullu, atuutissanngitsut.
Akitsuutinik qaffaaqqinnissaq nalunaarutigineqarpoq USA-p naalagaaffiata immikkut ittumik aallartitaa Steve Witkoff Ruslandip præsidentia, Vladimir Putin, naapitsinerata ullumi Moskvami, Ruslandip illoqarfiata pingaarnersaanni pinerani.
Naapinneq taanna pivoq, USA-p præsidentiata, Donald Trumpip, Ukraine-mi sorsunnerup unitsinneqarnissaa pillugu aalajangiussaa killissarititaasumut ullut marluk sioqqullugit.
Ruslandip sorsunnermik unitsitsinissaq akuersaanngippagu tallimanngornermi pissasoq, nuna taanna USA-mit pillaatissanik annertusaavigineqassasoq, Trump ilimasaarereernikuuvoq.
Trumpip marlunngornermi oqaatigaa, Witkoffip Moskvami naapinnerisa kingunerisaanik aalajangiinissani utaqqillugu.
Jurij Usjakov, Putinip siunnersortaa, ullup qeqqata kingorna Putinip Witkoffillu naapinnerat "angusaqarfiulluartumik" taavaa, naqissuserlugulu "ilimasaarutit" nunat taakku marluk akornanni nassiunneqarsimasut tiguneqarsimasullu.
Siunnersortip ilanngullugu oqaatigaa, USA-p præsidentia, Donald Trump, suli oqaloqatigiinnerup kingorna suli ilisimatinneqarsimanngitsoq.
- Taamaattumik itinerusumik oqaaseqarnissara kissaatiginngilara, Usjakov oqarpoq, neriorsuillunilu kingusinnerusukkut itinerusumik oqaaseqassalluni.
