Trump: Iran sorsunnermi matumani ajugaanavinngilaq
Iranimiut Israelimik oqaloqateqarusupput sorsunneq annikillisarniarlugu, tamannalu iluatsittariaqarpaat, "kingusinaartoqannginnerani", Trump oqarpoq.
USA-p præsidentia, Donald Trump, G7-imi nunat siuttuisa ataatsimiinnerannut Kananaskisimi, Alberta, Canadami, juunip 16-iat, 2025-mi, peqataassalluni apuuttoq.
Assiliisoq: Chris Helgren/Reuters/Ritzau Scanpix
Iran Israelimik oqaloqatiginnikkusuppoq sakkortuumik illuatungeriit imminnut saassuttaqattaarnerat annikillisinniarlugu, tamannalu piaarnerpaamik pissariaqarpoq, "kingusinaartoqannginnerani", USA-p præsidentiata, Donald Trump, ataasinngornermi oqarpoq.
- Iran sorsunnermi tassani ajugaanavianngilaq, Trump oqarpoq.
- Oqaloqatigiittariaqarput piaarnerpaamik, kingusinaannginnerani, Trump oqarpoq, maanna G7-imi ataatsimeersuarnermi Canadamiittoq.
Taamatumunnga ilutigitillugu amerikamiu pisortat ilaat oqarpoq Iranip Israelillu imminnut saassunnerat pillugu G7-imi ataatsimeeqataasut oqaaseqaasiussappata Trump atsioqataajumanavianngitsoq.
Nutaarsiassaqartitsivik Reuters taamak allappoq.
Oqaaseqaatissatut missingiut saqqummiunneqarpoq. Atorfilittat amerikamiut tv-qarfiannut CBS Newsimut oqaatigaat oqaaseqaasiatut missingiut Iranip nakkutigineqarneranik, tamatumalu saniatigut inuit illersorneqarnissaannik inassuteqarnermik imalik tunniunneqarsimasoq.
Amerikamiu atorfilittat ilaat CBS Newsimut paasissutissiivoq Trumpip suli Iranip atomip nukinganik atuilluni sakkussaanik pissarsinissaa pinngitsoortinniarlugu nangittumik sulissutigineqassasoq.
G7-imi ataatsimeersuarneq ingerlanneqarpoq piffissami sakkortunerpaamik, Iran Israelilu qaartartunik igeriuttakkanik ullut sisamassaat imminnut saassutileruttorfianni.
Iranimut saassussineq annertooq Iranip tungaanit nassuiaatigaa, Iranip naalagaaffiata atomip nukinga atorlugu sakkussaanik sanaartornissaa pinngitsoortinniarneqartoq.
G7-imi ataatsimiinneq Canadami Kananaskisimi pissaaq, Calgaryp avataaniittumi.
Trumpip ataasinngornermi pilersaarutaani siulleq tassaavoq Canadami ministeriuneq, Mark Carney, ataatsimeeqatigissallugu.
Maajimi siullermeerlutik ataatsimeeqatigiipput Illorsuarmi Qaqortumi.
- Attaveqaqatigiinneq pitsaasoq pilersissimavarput, niuerneq oqaluuserisassallu allat amerlasuut pillugit oqaloqatigiissutissaqarpugut, CBS News naapertorlugu Carneyimut Trump oqarpoq.
