Trump: Kalaallit Nunaat isumaqatigiissuteqartariaqarpoq
Natomut sunniuteqarpat Natomut sunniuteqassaaq, Trump Kalaallit Nunaata tiguarnissaanik kissaateqarnini pillugu taama oqarpoq. Kalaallit Nunaat aamma isumaqatigiissuteqartariaqartoq isumaqarpoq.
Trump USA-mi Floridamiit Washington D.C.-mut Air Force One-mi timmisartortilluni tusagassiortut apeqqutaannik arlalinnik akissuteqarpoq. Kalaallit Nunaat pillugu pilersaarutai apeqqutigineqartut ilagaat.
Assi: Nathan Howard/Reuters/Ritzau Scanpix
USA-p præsidentiata Donald Trumpip Kalaallit Nunaat USA-mik isumaqatigiissuteqaqqullugu kajumissaarpaa.
USA-p Nato pisariaqartinnginnerugaa Nato-lli USA pisariaqartinnerugaa aamma oqarpoq.
Timmisartumi Air Force Onemi nipinik immiussami præsidentip illorsuaniit YouTube-kkut saqqummersinneqartumi tusaaneqarsinnaavoq.
Tassani Trump USA-miit Kalaallit Nunaat pillugu Danmarkimut neqerooruteqartoqarsimanersoq aperineqarpoq.
- Taamaaliunngilanga, kisianni Kalaallit Nunaat isumaqatigiissuteqartariaqarpoq. Kalaallit Nunaatami Ruslandimit Kinamilluunnii tiguarneqarnissaq kissaatiginngilaa, Trump oqarpoq.
- Qimussit marluk
Kalaallit Nunaata illersorneqarnissaa qimussit marluk atorlugit isumagineqartoq Trumpi aamma oqarpoq.
- Tamanna ilisimavisiuk? Tamanna pitinnagu russit sakkutuuisa umiarsuaat suujunnaarsitsisut aqqartartuilu aamma Kinamiut sakkutuuisa umiarsuaat suujunnaarsitsisut aqqartartuilu sumi tamaaniipput.
- Nato-mut kinguneqassappat tamanna Nato-mut kinguneqarumaarpoq, uagutsinnilli pisariaqartinnerungaarpaat, præsidenti oqarpoq.
Tusagassiortup timmisartumi Air Force One-mi ittup Trumpimut eqqaavaa Tuluit Nunaata Tysklandillu ataatsimut Nato-p Kalaallit Nunaanni, issittumi isumannaallisaanermik illersuinissamik suliniuteqarnissartik oqaluuserigaat.
Tusagassiivik Bloomberg sapaatiummat kinaassutsiminik isertuussisut tunngaveqarluni allappoq Tysklandip NATO-p taamatut ataatsimoorluni suliaqarnissaa siunnersuutigigaa.
Tusagassiortup Trump aperaa tamanna pissutsinik naliliineranut allannguuteqartitsissanersoq.
- Naamik, tusariassagit. Pigissallugu eqqartortarparput (Kalaallit Nunaat aaqq.), sivikitsumik piffissaq sivikitsoq pinnagu. Pigilernissaa eqqartorparput. Taamaasiunngikkuttami Ruslandip Kiinalluunniit ingiassavaatigut, præsident oqarpoq.
Piginnittuunissarput pisariaqarpoq
TimmisartorsuarmiTrumpip naqissuserpaa, USA Kalaallit Nunaanni saqqutooqarfiuteqareersoq.
Amerlanerusunik sakkutuunik tikisitsissanersoq aperineqarami oqarpoq piumaguni ingerlaannaq sakkutuunik amerlasuunik Kalaallit Nunaannut aallartitsisinnaalluni.
- Annerunerusariaqarporli. Naggataatigummi "Piginnittuusariaqarpugut.,“ ("You need more than that. You really need the title," red.) Trump oqarpoq.
Tallimanngornermi Kalaallit Nunaanni Inatsisartuni partiit tallimat tamarmik ataatsimut nalunaaruteqarput, tassanilu erseqqissaqqinneqarpoq USA-mut Kalaallit Nunaata ilanngukkusunnginnera.
Danmarkip aamma nunat angisuut arfinillit illersornissamut isumaqatigiissuteqarsimasut sapaatip-akunnerata siuliani oqaatigaat, Danmark Kalaallit Nunaatalu kisimik Kalaallit Nunaata siunissaa pillugu aalajangiisinnaatitaasut.
Tamanna nalunaarummi ministeriunerup Mette Frederiksenip (S) saniatigut Tuluit Nunaata Tysklandillu siuttuinit allagaaqqami atuarneqarsinnaavoq.
"aqqummi avissaariartorfimmiippugut, piffissaasoq aalajangiiffiusoq“ sapaammi partiit siuttuisa oqallinneranni oqarpoq.
- Nato-mi suleqatigiinneq tunullugu iligisaq siorasaaraanni — siornatigullu misigineqarnikuunngitsoq — taava suut tamarmik unissapput, Mette Frederiksen oqarpoq.
/ritzau/
