Trump Kalaallit Nunaat pillugu: Nunarsuarmik kiffaanngissuseqarfiusumik illersuinissaq pineqarpoq
Trump naapertorlugu Kalaallit Nunaata tiguneqarnissaanut pissutaasoq tassaavoq „kiffaanngissuseqalersitsinissap“ angunissaa. Danmarkimi taama iliorsinnaanngilaq, taanna isumaqarpoq.
- USA-mut tamanna attuumassuteqanngilaq, uagulli kiffaanngissuseqalersitsisinnaavugut. Taakku (Danmark, aaqq.) taamaaliorsinnaanngillat, USA-p Kalaallit Nunaannik tigusinissaanut tunngatillugu Trump oqarpoq.
Assiliisoq: Mark Schiefelbein/Ritzau Scanpix
USA-p præsidentia Donald Trump isumaqarpoq USA-p Kalaallit Nunaat aqussinnaalissagaa.
BBC naapertorlugu præsidentip timmisartuani, Air Force One-mi, Las Vegasimiit Miamimut ingerlasumi tusagassiortunut taama oqarpoq.
- Isumaqarpunga nunap immikkoortua taanna (Kalaallit Nunaat, aaqq.) tigussagipput, Trump oqarpoq.
Nangillunilu oqaatigalugu qeqertami innuttaasut 57.000-ingajaat “USA-miikkusuttut”.
Trump oqarpoq nalullugu „Danmark qanoq piumasaqarsinnaanersoq, akuerinngikkunikku inussiarniitsumik iliussalluni, tassami silarsuaq kiffaanngissuseqarfiusoq illersorneqartariaqarmat“.
„Silarsuarmi kiffaanngissuseqartoq illersorniarlugu taamaaliorpugut“, taanna oqarpoq.
- USA-mut tamanna attuumassuteqanngilaq, uagulli kiffaanngissuseqalersitsisinnaavugut. Taakku (Danmark, aaqq.) taamaaliorsinnaanngillat.
Trump novembarimi præsidentitut qinigaangamili Kalaallit Nunaata pisiarinissaanik soqutiginninnini ersersittuarpaa. Præsidentip isumassarsiaani tamanna nutaajunngilaq. Siullermik præsidentiuffimmini aamma oqarpoq Kalaallit Nunaat pisiarerusullugu.
Sapaatip-akunnerata siuliani Mette Frederiksen minutsini 45-ni oqarasuaatikkut oqaloqatigaa. „Oqaloqatigiinnerat toqqaannartorujussuarmik pisoq,“ ministeriuneq DR-imut oqarpoq.
Ministeriuneq ima oqarpoq:
- Oqaloqatigiinnermi ministeriunerup Naalakkersuisut siulittaasuata Múte B. Egedep Kalaallit Nunaata tuniniarneqannginnera pillugu oqaaserisai innersuussutigai, ministeriunerlu oqarpoq namminiilivinnissaq pillugu Kalaallit Nunaat nammineq aalajangiisussaasoq.
Múte B. Egedep oqaatigaa USA illersornissaqarnermut aatsitassarsiornermullu tunngatillugu qaninnerusumik suleqatigerusullugu.
Trumpip qanillattornerata kingorna danskit naalakkersuisui Issittumi aningaasaliiniarlutik illersornissamut isumaqatigiissutip qaavatigut nutarterinissamut 15 milliarder koruuninik aningaasaleeqqinnissamik pilersaaruteqarput.
Aningaasat umiarsuarnut amerlanerusunut, dronenut marlunnut Siriusillu alapernaarsuiartortitaasa qimusseqatigisassaannut marlunnut atorneqarumaarput.
Aammattaaq Kangerlussuarmi mittarfik timmisartunik sorsuutinik F-35-nik sullissisinnaangortissallugu pitsanngorsarneqartussaavoq.
2019-imiilli politikkikkut pissutsit allanngorluinnarput, ingammik ukiut pingasut matuma siorna Ruslandip Ukrainemik tiguaanerata kingorna, tamatuma Europami sorsunneq atuutilersimmagu.
Tamatuma saniatigut Issittoq – taamaalillunilu Kalaallit Nunaat – isumannaallisaanikkut qitiunerulersimavoq, Ruslandip, USA-p Kinallu sakkulersornerulernerisa nalaanni.
