Trumpi aallaaneqareernerup kingorna oqalugiaannarusukkaluarpoq

Donald Trump Pennsylvaniami qineqqusaarnermini aallaaneqareerluni oqalugiaqqikkusukkaluarpoq.

Timmisartumi nammineq pigisami Republikanerit partiiata ataatsimeersuarnissaanut Milwaukeemut ingerlaarnermi præsidentiusimasoq aviisimit New York Postimit apersorneqarluni taama oqarpoq.

- Oqalugiaannarniaraluarpunga, aallaaneqaqqammerpungali, oqarpoq.

Illoqarfimmi Butlerimi Pennsylvaniamiittumi silami qinersisartunik ataatsimiisitsinermi oqalugiarnerani siutaata talerpiata tungaatigut aallaaneqarpoq.

Amerikamiut tusagassiivii naapertorlugit aallaasersorfiusumi aallaat AR-15 nassaarineqarpoq.

AR-15-imik aallaaneqarsimasumik aniguisumik aatsaat nakorsaq takusimasoq, nakorsameereernerup kingorna Trump oqarpoq.

- Napparsimmavimmi nakorsaq aatsaavissuaq taama pisumik naammattuuinerarpoq. Tupinnartuliatut taavaa, Trump New York Postimut oqarpoq.

Eqqaassinerup nalaani niaqquni talerpimmut sangutiallassimanngitsuuguniuk aniguisimassanngikkaluarluni, siornatigut præsidentiusimasoq isumaqarpoq.

Trumpip assiliartaq allagartarluunniit oqaluuserissaminut tunngasoq takuniarlugu niaqquni sangutippaa. „Inatsisaatsuliortumik nunasisarneq“ eqqartortillugu aallaaneqarpoq, oqaluttuarpoq.

Pinerluttutut pasineqartoq, Thomas Matthew Crooks 20-nik ukiulik, Trumpip aallaaneqareernerata kinguninngua isertortumik paasiniaasartunit aallaaneqarluni toqutaavoq. Crooks pisoqarfiup qanittuani illup qaavaniissimavoq.

Trumpip saniatigut najuuttut pingasut aallaaneqarput, ataaseq toquvoq allallu marluk inuunerinik navianartorsiortitsisumik ajoquserput.

Naak toqutseriartoqaraluartoq Republikanerit ataatsimeersuarneranni ataasinngornermi Milwaukeemi Wisconsinimiittumi Donald Trump peqataaniarluni aalajangerpoq.

Tassani partiimi præsidentitut qinigassanngortinnissaa naatsorsuutigineqarpoq.

Trump sisamanngorpat ataatsimeersuarnermi oqalugiassangatinneqarpoq.

/ritzau/