Trumpimik tapersersuisutut ilisimaneqartoq: Jørgen Boassen akiliisinnaajunnaartoq
Jørgen Boassen, ukioq manna siusinnerusukkut Donald Trumpimik tapersersuisutut MAGA-llu Kalaallit Nunaanni siammarnissaanik suliniuteqartutut ilisimaneqartoq, qarmaasutut suliffeqarfiutimini akiliisinnaajunnaarpoq
Jørgen Boassenip suliffeqarfiutaa akiliisinnaajunnaarpoq, tusagassiorfik Building Supply allappoq.
Assi: Arnaq Nielsen
Qarmaasoq Trumpimillu tapersersuisoq tusaamasaq Jørgen Boassen 51-inik ukiulik qarmaasutut suliffeqarfiutimini akiliisinnaajunnaarpoq.
Building Supply taama allappoq.
Kisimiilluni suliffeqarfiutaa Nuup Qarmaasua Kalaallit Nunaanni Eqqartuussivimmi akiliisinnaajunnaartutut maajip 19-ianni nalunaarutigineqarpoq.
Suliffeqarfik 2019-imi septembarip aappaani pilersinneqarpoq, ukiulli arfinillit qaangiutiinnartut matusariaqalerpoq.
Jørgen Boassen oqaaseqartissinnaasimanngilarput.
Nuna Advokater ApS-imi eqqartuussissuserisoq Charlotte Pedersen, akiliisinnaajunnaarsimasut pigisaannik nakkutilliisoq, suliaq pillugu oqaaseqarusumanngilaq.
Jørgen Boassen Kalaallit Nunaanni Donald Trumpimik tapersersuinerpaat ilaattut ilisimaneqarpoq, tamannalu nunatsinni nunanilu tamalaani tusagassiorfinni arlalinni allaaserineqarsimavoq.
MAGA-p siammartinnissaa ilaatigut siuttuuffigisimavaa. Siornatigut USA-mik suleqateqalernerup Kalaallit Nunaata namminiilivinnissaanut periarfissanik siuarsaasinnaanera pillugu isumalluarluni oqaaseqarsimavoq.
Boassen USA-mi qineqqusaarnermi peqataalluarpoq, tassanilu illumit illumut angalaarluni qineqqusaarnermi suleqataavoq. Donald Trump Jr. Floridami novembarimi naapeqqaarpaa, qinersinerullu nalaani Floridami West Palm Beachimi Republikanerit qineqqusaartitsinerannut qaaqqusaavoq, tassani senatorit arlallit Trump Jr-ilu peqataapput.
Tamatuma kingorna Donald Trump Jr.-ip 2025-mi januaarimi Nuummut tikeraarnissaanut pilersaarusiornermi pingaarutilimmik inissisimavoq, tassani Jørgen Boassen takornariartitsillunilu qaaqqusisutut peqataavoq.
Aammattaaq qimussimik sukkaniunneq, præsidentip tulliata J.D. Vancep nuliatalu Usha Vancep piffissap sivikitsup ingerlanerani peqataaffigisinnaajunnaarsimasaat, tapersersorniarlugu aningaasanik pissarsivoq.
Sermitsiap Jørgen Boassen akiliisinnaajunnaarsimanera pillugu oqaaseqartinniarsaraa.
