Trumpip Kalaallit Nunaat akisussaaffigilerusullugu oqaatigeqqippaa
USA-p Kalaallit Nunaat “pisariaqaraa” USA-p præsidentia Donald Trump nutaarsiassaqartitsivik AFP naapertorlugu oqarpoq.
Foto: Evelyn Hockstein/Reuters/Ritzau Scanpix
Kalaallit Nunaat USA-mut ilanngunnissaa kissaatigalugu USA-p præsidentiata Donald Trumpip uteqqippaa.
- Oqaatiginissaa nuannarinngikkaluarpara, kisianni Kalaallit Nunaat pisariaqarparput, præsidenti podcastimik aaqqissuisumit Vince Coglianesemit apersorneqarluni oqartoq nutaarsiassaqartitsiviup AFP-pallaaseraa.
- Nunat tamalaat akornanni isumannaatsuunissaq toqqissisimanissarlu eqqarsaatigalugit Kalaallit Nunaat pisariaqartipparput, AFP naapertorlugu taanna aallakaatitassiortumut oqarpoq.
USA-p præsidentiata tulliata J.D. Vancep nulianilu Usha Vance Kalaallit Nunaannut tallimanngorpat tikeraarnissartik nalunaarutignieraniit aqaguani taama pisoqarpoq.
Usha Vance USA-mi sillimaniarnermut siunnersorti Mike Waltz aamma nukissiornermut ministeri Chris Wright ilagalugit tikeraarniartoq præsidentip illorsuanit nalunaarutigineqaqqaaraluarpoq.
Usha Vancep sumiiffinnut oqaluttuarisaanermut tunngasunut takornariartussaagaluarpoq, kalaallit kulturikkut kingornussaannik paasisassarsiorluni aamma Kalaallit Nunaanni qimussimik sukkaniunneq isiginnaassallugu.
Tikeraarfissat taakku taamaatillugit Pituffimmut Space Basemut tikeraartoqarnissaa præsidentip tulliata allaffia marlunngornermi unnukkut nalunaarpoq.
Tassani aappariit Vancekkut Issittumi isumannaallisaanermut tunngasunik paasissutissinneqassapput amerikamiullu sakkutuui naapissallugit.
/ritzau/
