Trumpip Kalaallit Nunaata pingaaruteqarnera erseqqissaqqippaa
Donald Trumpip Norgep ministeriunera peqatigalugu tusagassiortunik katersortitsinermini Kalaallit Nunaat pillugu apeqqutit itisiliisut akinaveersaarpai.
Norgep ministeriunerata Jonas Gahr Størep USA-p præsidentia Donald Trump sisamanngornermi ataatsimeeqatigaa.
Assi: Kevin Lamarque/Reuters/Ritzau Scanpix
Kalaallit Nunaata nunarsuarmi eqqissinermut pingaaruteqarnera USA-p præsidentiata Donald Trumpip sisamanngormat uteqqippaa.
Nutaarsiassaqartitsivik Reuters taama allappoq.
Norgemi ministeriuneq Jonas Gahr Støre tusagassiortunik katersortitsiqatiginerani oqarpoq.
Tassani Trump Kalaallit Nunaat pillugu aperineqarpoq. Apeqqutilli itisiliisut akinaveersaarlugit.
- Kalaallit Nunaat pissanganassaaq - ullorli alla taanna apeqqutigineqarumaarpoq, Trump tusagassiortunik katersortitsinermi oqartoq nutaarsiassaqartitsivik NTB allappoq.
Tamatuma kingorna nunarsuarmi eqqissinissaq eqqarsaatigalugu Kalaallit Nunaata pingaaruteqassusia pillugu oqariartuutini uteqqippaa.
Kalaallit Nunaat eqqartorumanngikkaa
Størep Trumpimik præsidentip illorsuani ataatsimeeqateqarnissaa sioqqullugu Norgemi inatsisartut Kalaallit Nunaat aamma oqaluuseraat.
Støre Trumpimut "Kalaallit Nunaat alaqqullugu" oqariartuuteqaqqullugu kaammattorneqarpoq. Norgemi tusagassiorfik NRK pingasunngornermi allappoq.
- Kalaallit Nunaat pillugu eqqartuiartorlunga Washingtonimukalinngilanga.
- Issittorli Kalaallit Nunaallu qaqinneqassappata Norgemi qanoq isumaqarnerluta eqqaajumaarpara, isumaqarpungali USA-mi ilisimaneqareertoq: Kalaallit Nunaat kunngeqarfiup Danmarkip ilagaa isumaqarpugut, NRK naapertorlugu Støre akivoq.
Immikkut ilisimasallit: USA-p Kalaallit Nunaannut aallartitai amerlanerulissapput
Trump qanittukkut Kalaallit Nunaannut kilitsissianik isertortumillu paasiniaasartunik amerlanerusunik aallartitsissasoq immikkut ilisimasallit marluk danskit tusagassiorfiannut Ekstra Bladetimut sapaatip-akunnerani matumani naliliipput.
USA-p Nuummi aallartitaqarfia Nuup qeqqaniittumi allaffeqarfissuarmut nutaamut inissinneqarpat malunniutilimmik angininngortussaanera pissutigalugu ilisimasallit taamatut oqariartuuteqarput.
- Danmarkip, Kalaallit Nunaata USA-llu akornanni nunanut allanut politikkimut tunngatillugu iliuutsit annertusiartorput. Amerikamiut aalartitaqarfitsik nuannariinnarlugu allisinnavianngilaat.
- Anguniagartik anguniarlugu nukiit amerlanerusut atorpaat: Kalaallit Nunaat tiguarniarlugu, Jacob Kaarsbo, sillimaniarnermut politikkimut tunngasunik siunnersorti attuumassuteqanngitsoq illersornissamullu tunngasunik paasiniaanermi pisortaasimasoq Ekstra Bladetimut oqarpoq.
USA-p Kalaallit Nunaat tiguarusukkaa, aamma USA-p nunarsuarmi eqqissineq isumannaassuserlu eqqarsaatigalugit qeqertaq pisariaqartikkaa USA-p præsidentia Donald Trump arlaleriarluni oqaatigisarpaa.
Panamap kanalianut Kalaallit Nunaannullu tunngatillugu sakkutooqarnikkut aningaasatigullu iliuuseqarsinnaanini tunuarsimaarfiginagu tusagassiortunik katersortitsinermi januaarimi toqqaannartumik aperineqarami oqarpoq.
Trumpip Kalaallit Nunaannik akisussaaffeqalerusulluni kissaateqarnera Kalaallit Nunaata danskillu naalakkersuisuisa arlaleriarlutik itigartittareerpaat.
