Trumpip Zelenskyj ataatsimeeqatigitinnagu Putin oqaloqatigissavaa
Missilit Tomahawkit Ukrainemut tunniussassat ataatsimiinnermi oqaluuserineqarnissaat naatsorsuutigineqarpoq, tamannali sioqqullugu Trumpip Putin oqaloqatigissavaa.
Augustimi Alaskami USA-p præsidentiata Donald Trumpip præsidenteqatini Vladimir Putin naapippaa. Tamatumali kingorna Trumpip Putin pillugu pakatsisimaarnera annertusiartuinnarpoq, eqqissisoqarnissaanut alloriarnerit amigaataanerannik aallaavilimmik. (Asseq toqqorsivimmit)
Assiliisoq: Kevin Lamarque/Reuters
USA-p præsidentia, Donald Trump, sisamanngornermi oqaloqatigissavaa Ruslandip præsidentia, Vladimir Putin, Ukrainemi sorsunnersuarmut tunngasunik.
Tamanna uppernarsarneqarpoq Præsidentip illorsuani atorfilittamit, nutaarsiassaqartitsivik Reuters allappoq.
Siusinnerusukkut ilisimannittumit Axios-imut paasissutissiissutigineqarpoq, Trump aamma Putin sisamanngornermi amerikamiut nalunaaqutaat malillugu oqaloqatigiittussaasut. Ilisimatitsissutigineqanngilaq qaqugorpiaq oqaloqatigiinneq pissanersoq.
Tallimanngornermi Trumpip Ukrainep præsidentia, Volodymyr Zelenskyj, præsidentip illorsuani Det Hvide Hus-imi naapittussaavaa.
Zelenskyjip Trump naapikkumasimavaa, sakkussanik tapersersorneqarnerunissamik qinnuiginnilluni.
Kingullertigut taassuma Trump qinnuigaa Ukrainemut missilinik ungasissumut igeriunneqarsinnaasunik Tomahawkinik tunnissuteqassasoq.
Taakku atorlugit Ukrainemi sakkutuut Moskvamut illoqarfiillu allat anginerusut russit illoqarfii eqqorneqarsinnaassammata.
Zelenskyjip taamaaliornikkut neriuutigaa, Putin pinngitsaalillugu eqqissinissamik isumaqatigiinniartinneqarsinnaassasoq.
Russit sinnerlugit isumaqarput, tamanna pissappat sorsunneq sakkortuseriartinneqassasoq, amerikamiut Ukrainemut Tomahawkinik tunniussissappata.
Taamaattoqassappat USA-p Ruslandillu akornanni peqatigiinneq ajoquserneqassaaq, Kremlin-imit mianersoqqussutigineqarpoq.
Trump oqarnikuuvoq, sakkussat Ukrainemut tunniunneqarsinnaasut, Putin isumaqatigiinniarnissamut peqataajumanngiinnassappat.
Amerikamiut præsidentia qaammatini kingullerni Ruslandimut Putinimullu pakatsisimaarnera annertusiartuinnarnikuuvoq.
Taamatuttaaq Ukrainemut illersuisutut inissisimanini annertusarsimavaa Russit sakkutuuinut akiuunneranni, taakku februaarimi 2022-mi Ukrainemut isaallutik sorsunnermik aallartitsinikuupput.
Ukrainemi Ruslandilu piffissami kingullermi sorsunnerup sakkortusineranik takussutissiipput pingaartumik nukissiuuteqarfinnut saassussineq annertusiartuinnavilluni.
