KL

DK

Tulluusimaarlunilu qujamasuttoq: Palle Jerimiassen qineqqusaarnissamut piareersimasoq

Kommunip aningaasaqarnerata pitsaasumut saateqqinniarnera, kommunip avinneqarnissaa, kommunalbestyrelsip suleqatigiinnera kiisalu Aalisarnermut inatsi Avannaata Kommuniata borgmesterianut ukioq manna initusimaqaat. Taassuma saniatigut paasissutisisissutigaa aappaagu kommunimut qinersisoqarnissaanut qineqqusaarniarluni.

Tôrtia Reimer-Johansen
Journalist
Offentliggjort

Ukioq 2024 Avannaata Kommuniata borgmesterianut, Palle Jerimiassenimut ulapaarfiusimaqaaq. Taassuma ukioq kommunimut ineriartorfiusoq, angusaqarfiusoq unamminartorsiorfiusorlu kingumut qiviarpaa.

Kommuni aningaasaqarnermigut unamminartorsiornera, pitsanngoriaarit aalisarnermullu inatsisissap innuttaasunut ataasiakkaanut qanoq sunngiuteqassanersoq kiisalu meeqqanut tunngasut initusimasut, oqaluttuaraa:

-  Politikkikkut suliani pingaarnertut angusatut isigisara tassaavoq kommunip aningaasaqarnerata pitsaasumut saateqqinnera. Ukioq 2023-mi aningaasatigut killiffipput ilungersunartumut pinikuusoq aaqqinniarlugu suliniutit assingiinngitsut ingerlatagut iluatsilluarsimapput tamannalu assut nuannaarutigaara. 

Kommunip aningaasaqarnera ajornartorsiorfiummat Naalakkersuisunit annertusisamik nakkutigineqarpoq, kommunilli aningaasaqarnera siumut aallarmat nakkutiginninneq taamaatinneqaqqammerpoq.

Aalisarnermut inatsut suli inituvoq

Aalisarnermut inatsi upernaaq atuutilersinneqarpoq. Taannalu kommunimi ulapputaasimaqaaq, Avannaata Kommunianimi aalisarneq annertuumik inuussutissarsiutaammat. 

-  Aalisarnermut inatsisissaq suli inituvoq kommunitut aalisarfeqarfissuartut inissisimanerput peqqutaalluni. Inatsisissap innuttaasutsinnut ataasiakkaanut sunnitigisinnaasai pillugit oqallinneq annertooq ingerlannikuaarput aamma kommunimiit annertuumik peqataaffigalutigu.

-  Qaleralinnut tunngasortaa assut initusimavoq massakkumullu aamma suli inituvoq nalunaarutit takkussuutilernerisa kingunerisaanik takuneqarsinnaaleriartorami inunnut ataasiakkaanut qanoq kinguneqassanersoq.

Meeqqanut tunngatillugu suliniutit

Sunaluunniit suliaq tamatigut pitsanngorsarneqarsinnaasartoq, meeqqanut tunngasut suliniutit malunnartumik pitsaanerusup tungaanut ingerlanerat nuannaarutigineqarpaa:

- Ilaqutariit avissaartuutsinnagit ilaqutariittulli ataatsimoorneq oqaloqatigiinnerlu atorlugu ingerlaqutariit ingerlariaqqinnissaannut nukittorsaanerit kommunitsinni annertusarlugu ingerlalernera sulilu nukittorsaaviginera politikkikkut suliani pingaarnertut isigisarpara. Taamaasiornikkummi ilaqutariit toqqissimasut angusinnaavagut meeqqallu angerlarsimaffiup avataanut inissinneqartartut minnerpaaffianissinnissaat aqqutissiuussinnaagatsigu.

Tikkuartuunneq ungasillisitsisarpoq

Palle Jerimiassenip aalisarnermut takornarialerinermullu suliffeqarfiit nersualaarpai, taakkuummata kommunip aningaasaqarneranut nukittorsaasut.

-  Partiit tamarmik anguniarpaat innuttaasut pitsaasumik atungaqartinneqarnissaat tamannalu aatsaat anguneqarsinnaavoq ataatsimoornikkut. Tikkuartuulluni sulineq imminnut ungasillinermik kinguneqartarpoq, tusarnaarlunili inerisataqarnissamik siunnerfilimmik suleqatigiikkaanni sunaluunniit anguneqarsinnaavoq.

- Qinersinissamut sassarpunga

Palle Jerimiassenip ilanngullugu paasissutissiissutigaa kommunimut qinersisoqalerpat Avannaata Kommuniani sulinini nangeqqikkusullugu.

- Qinersinissamut sassaqqissaanga, Palle Jerimiassen 2021-imi qinersisoqareernerata kingorna attaviitsunngortoq oqarpoq.

- Tamannguassi juullisiorluarisi ukiumullu qaangiuttumut qujanaq. Ukiumi nutaami tamassi angusaqarluarnissassinnik peqqinnermillu kissaappassi.

inuiaqatigiit fiskerilov børneområdet avannaata kommunia palle jerimiassen økonomiske udfordringer samfund

ATORFIIT Se alle jobs

Powered by Labrador CMS