Tuluit nunanut allanut ministeriata EU-mut attaveqaleqqissinnaaneq periarfissatut isigigaa

- Ulloq oqaluttuarisaanermut pingaarutilik, EU-mut attaveqarnitta nutaamik aallartinneranut peqataanera nuannaarutigaara.

Tuluit nunaanni nunanut allanut ministeri David Lammy ataasinngornermi oqarpoq.

Tuluit Nunaat EU-mut ilaasortaajunnaarmalli EU-mi ministerit ataatsimiinnerinut taakku peqataaneq ajorput, ataasinngornermili tamanna pivoq. Partii suliniaqatigiiffiusoq Labour qinersinermi ajugaanerata kingorna Tuluit Nunaata EU-llu suleqatigiinnerat aallartinneqaqqilerneranut ersiutaavoq.

- Europami isumannaallisaanermut tunngasut pingaarutillit pillugit EU-mi nunat ilaasortat 27-t nunanut allanut ministerii oqaloqatigisinnaagakkit nuannaarutigaara, ataatsimiinnissamut apuunnermini David Lammy oqarpoq.

EU-p nunanut allanut tunngasunut pisortaanit, Josep Borrellimit, ataatsimiinnermut qaaqquneqarpoq. Tamannalu pivoq EU-p kommissioniata siulittaasuata Ursula von der Leyenip Tuluit Nunaata ministeriuneranik Keir Starmerimik Bruxellesimi ilassinninnerata kinguninngua.

Tassani EU-p Tuluillu Nunaata akornanni ataavartumik pingaarutilinnik ataatsimeeqatigiittarnissaat isumaqatigiissutigineqarpoq.

Brexitip Londonip Bruxellesillu akornanni ukiorpassuarni aaqqiagiinngissuteqartitsisimanerata kingorna ataatsimeeqatigiittaqqilernerit politikkikkut ataqatigiissaarinissamut aamma illuatungeriit taakku marluk nalinginnaasumik attaveqatigiinnerulernissannut iluaqutaassaaq.

Ministerit akornanni aamma ataqatigiissaarisoqarnissaa pisariaqartoq David Lammy oqarpoq.

- Tuluit Nunaata EU-llu isumannaatsuunissaat avissaartinneqarsinnaanngilaq. Ruslandip Ukrainemut saassussinera imaluunniit Kangiani Qiterlermi ajornartorsiuterujussuaq akerleriissutaaqisut eqqarsaatigalugit, oqarpoq.

/ritzau/