Tunngaviusumik inatsisissaq: Atorfilittat nutaat aallarteqqammerput

Naalagaaffinngornissamut nunanullu allanut tunngasunut naalakkersuisup Vivian Motzfeldtip (S) ataasinngornermi apriilip 22-ani nalunaaqutaq 14.00 ammasumik isumasioqatigiinnissamut qaaqquneqarnera Inatsisartut Inatsisinut Ataatsimiititaliaata iluatsippaa, tassani tunngaviusumik inatsisissaq pillugu suliap sumut killinnera paasiniarneqassalluni.

Tunngaviusumik inatsisissatut siunnersuutip immikkoortui sorliit Naalakkersuisut naammassineqarsimanngitsutut isigineraat,Inatsisinut ataatsimiititaliap ilaatigut paaserusuppaa:

- Immikkoortuni arlalinni nassuiaatit tunngaviusumik inatsisissatut siunnersuutip ilaanut ilaanngitsut nassuiaatigineqaqqaartariaqarput. Immikkoortuni arlalinni nassuiaatit naalakkersuisoqarfiup qanittukkut misissortariaqarpai. Taamaattumik siunnersuut naammassinngitsutut nalilerneqassaaq, Vivian Motzfeldt ataatsimiinnerup aallartinnerani oqarpoq.

Atorfilittat atorfinitsinneqaqqammersut

Naalakkersuisoqarfik maanna missingersuummi amigaatinik, ilaatigut paragraffinik nassuiaatinik, immersuiniarluni suliaqartoq, Naalakkersuisoq nangilluni oqaluttuarpoq. Naalakkersuisup oqarnera naapertorlugu naalakkersuisoqarfik suli paasiniaavoq suliaq qanoq siuariartiginersoq, suliaq Naalakkersuisut Siulittaasuata Naalakkersuisoqarfianit tiguneqarmat.

- Naalagaaffinngornissamut naalakkersuisoqarfik pilersinneqaqqammermat aatsaat ukiortaami suliassat agguataarneqarnerat inissippoq. Taamaattumik naalakkersuisoqarfiup suliassat, ilaatigut tunngaviusumik inatsisissaq inisseqqammerpai, Vivian Motzfeldt oqarpoq.

Maannakkut atorfilittat marluk suliamik suliaqarput, Naleqqameersoq Hans Enoksen aperivoq atorfillit amerlanerusut atorfinitsinneqarsinnaanersut. Vivian Motzfeldt akivoq sulisumik ataatsimik aamma ullup ilaannaa sulisartussamik atorfinitsitsisoqarsinnaasoq. Taamaalilluni sulisut pingasut sisamat missaanniittut ulloq naallugu tunngaviusumik inatsisissaq suliarisinnaagaat.

Peqataatitsinermi?

Inatsisinut ataatsimiititaliap aamma paaserusuppaa Kalaallit Nunaata tunngaviusumik inatsisaanik suliaqarnermi innuttaasut qanoq peqataatinneqartassanersut, ilaatigut atuaruminartumik tunngaviusumik inatsisiliortoqassanersoq.

Naalakkersuisoqarfiup suli paasiniarlugu siulittaasup naalakkersuisoqarfia tunngaviusumik inatsisip tamannalu pillugu paasissutissiinerup qanoq ingerlasimanerannik paasiniarneqartoq, tassani ilisimatitsissutigineqarpoq.

Tunngaviusumik inatsisissap qanoq atuaruminarsarneqarsinnaanera suli isumaliutigineqarpoq, immikkoortut naammassineqaqqaartariaqarnersut imaluunniit tunngaviusumik inatsisip innuttaasunut atuaruminarnerulernissaa sulissutigineqartariaqarnersoq naalakkersuisoqarfimmit misissorneqaleruttorpoq.

Innuttaasut kikkut naapissavaat?

Inatsit Tunngaviusussaq pillugu Isumalioqatigiissitanut ilaasortat maanna peerneqarsimasut, suliaq pillugu innuttaasunik paasissutissiiniarlutik sooq Kalaallit Nunaanni angalaqataassanersut Inatsisinut Ataatsimiititaliap aamma apeqqutigaa.

- Isumalioqatigiissitanut ilaasortaasimasut paasissutissiinermi peqataatinneqarnissaannut Naalakkersuisut ammapput, suliaq pillugu ilisimasaqarluarmata. Aamma apeqquteqarfigineqarsinnaapput. Politikerilli tunngaviusumik inatsisissatut siunnersuutip suliarineqarneratalu ingerlateqqinnissaa isumagisussaavaat, Vivian Motzfeldt oqarpoq.

Kommunit suleqatigalugit innuttaasunik ataatsimiititsinerit pilersaarusiorneqartut naalakkersuisoq ilanngullugu ilisimatitsivoq. Kommunit tassani suleqataasinnaapput suliniut tunngaviusumik inatsisissamilu kapitalit assigiinngitsut pillugit paasissutissanik nunaqarfinnut avinngarusimasunullu soorlu Qaanaamut siaruarterinermut.

Angalaneq aamma podcast

Aamma tunngaviusumik inatsimmi immikkoortut aalajangersimasut innuttaasunit taasissutigineqarnissaat oqaluuserineqarsinnaavoq, innuttaasut taamaalillutik tunngaviusumik inatsimmik ilusilersuinermut peqataasinnaaniassammata.

Kalaallit Nunaanni angalaneq innuttaasunik aggustimi ataatsimiititsinissaq pilersaarutaavoq. angalaneq sapaatip-akunnerini pingasuni sivisussuseqassaaq, angalanerullu saniatigut Tasiilami Qaanaamilu paasissutissiilluni ataatsimiititsinissaq pilersaarutaavoq.

Tamatumalu saniatigut inatsit tunngaviusussaq immikkoortuilu pillugit podcastiliortoqarsinnaavoq, taamaalilluni innuttaasut amerlanerusut paasitinneqassammata.

Ataatsimiititaliaq: Minitaqarnissaq pinngitsoortinneqassaaq

Isumasioqatigiinnerup naggataani Inatsisinut Ataatsimiititaliap Naalakkersuisut kajumissaarpai.

Tunngaviusumik inatsisissamik suliaqarneq ataqatigiissaarineqassasoq ataatsimiititaliap kaammattuutigaa, tamakkiisumik siunnersuutissatut partiinit innuttaasunillu tamanit taperserneqarsinnaasutut saqqummiunneqassammat.

Tunngaviusumik inatsisissaq naammassineqarpat minitaqartoqannginnissaa qulakkeerneqassasoq, ataatsimiititaliap naalakkersuisumut kaammattuutigaa.