Tasiilami Nuummilu sapaatiummat akerliussutsimik takutitsisoqarpoq.
- Naammaleqaar! Eeeh! Tunumiut inooqataapput, tunumiut naleqarput! Tunumiut nikananngillat! Tunumiut ilissitulli naleqarput!
Tasiilami Nuummilu sapaatiummat akerliussutsimik takutitsisoqarpoq.
- Naammaleqaar! Eeeh! Tunumiut inooqataapput, tunumiut naleqarput! Tunumiut nikananngillat! Tunumiut ilissitulli naleqarput!
Tasiilami innuttaasut oqartussaasut sakkortuumik isornartorsiorpaat, piumasaralugulu nunap immikkoortuani uninngatitsiinnarneq pinngitsoortinniarlugu ineriartuutaasussanik iliuuseqartoqassasoq.
Nuummi innuttaasut arlallit tapersersuillutik akerliussutsimik takutitsinermi peqataapput, Inatsisartullu silataani akerliussutsimik takutitsisut ilaatigut Naalakkersuisut siulittaasuannit Jens-Frederik Nielsenimit (D) naapinneqarput.
Tassani Lars Poulsen (S) aamma Gerth Mikaelsen (N), Inatsisartunut ilaasortat Tasiilameersuusut, siulittaasumut akerliussutsimik takutitsisut oqariartuutaat saqqummiuppaat:
- Tasiilami nunaqarfittaanilu pisoq asuliinnaanngittumik oqariartorneruvoq, inuuniarneq ilungersunarsiartuinnartoq, suliffissaaleqineq qaffakkiartuinnartoq, inissaaleqineq qaffariartuinnartoq naammangiunnaarpaat, oqariartorneq asuliinnaanngilaq, maani Nuummi malugitipparput, Lars Poulsen oqarpoq.
- Meerartatta siunissanik ilusilersuinissaq uagut qinikkatut suliassaraarput, sanarfisassarpullu maani, taanna nangippoq.
Jens-Frederik Nielsen, Lars Poulsen Gerth Mikaelsen tapersersuisunik Inatsisartut silataani akerliussutsimik takutitsisunik naapitaqarput.
Foto: Oline Inuusuttoq Olsen
Ajornartorsiutit ilumoornerarai
Jens-Frederik Nielsenip (D) Tasiilami nunaqarfinnilu innuttaasut akerliussutsimik takutitsineranni ajornartorsiutit ersersinneqartut nassuerutigai:
- Asuliinnaanngilaq oqariartorneq. Ilumoorpoq nunatta kangiani ineriartorneq arriippallaarnikuuvoq, tamanna iliuuseqarifgineqaertariaqarpoq, naalakkersuisut pimoorutivissorlugu, naalakkersuisullu isumaqatigiissutaat qiviaraanni, ajunngittut ineriartuutissallu arlallit suliarinikuuavut, pimoorullugillu taakku suliarerusuppagit, oqaluinnarneq naammassanngimmat.
- Attaveqaatitigut pitsanngorsaarusuppagut, mittarfiit eqqartuinnarunnaarlugit piviusunngortikkusuppagut, aalisarnikkut ineriartortitsinerorusuppagut, suliffissat ataavartut pilersikkusukkatsigit, aamma kinguariit tulliinut iluaqutaaniassammata, Jens-Frederik Nielsen
Iliuuseqaqqusisut
Kulusumeersup Nuummi akerliussutsimik takutitseqataasup siulittaasumut iliuuseqarfigineqaqqusilluni piumasaqarpoq:
- Uagut kangianinngaanniit qimarrappugut. Kulusumminngaanniit qimaavugut tamaanga. Inuuniarneq artornartorsiartuinnarpoq, pisiassat akitsoraluttuinnarput, pilersorneqarnerput killeqaleraluttuinnarpoq. Naalakkersuisuusartut ukiuni taakkunani neriorsuisarput, suliaq aallartilerpoq, qinersineq aallarteqqissaaq, uanga oqarusuppunga, oqaatsit tamakku tusarnerput, kusanarput kisianni timitalersuisarlusi, Moses Bajare oqarpoq.
