Tunumi nassaat nassuiaruminaatsut

- Niaqqut saarngi aamma illukut pillugit oqaluttoqaqqusaanngitsoq misigisimajuaannarpunga. Maanna peerutinnginninni oqaaseqarnissamut piffissanngorpoq.

Dines Pike 72-inik ukiulik Ittoqqortoormiini najugaqartoq taama oqarpoq.

Taassuma nunaqqataasalu inuit niaquisa saarngi aallaaneqarsimasutut isikkoqartut, illukut, Tunumi ukiorpassuarni arlaleriarlutik takusarsimasaminnik nammineq oqaluttuaat AG-p uani oqaluttuarai.

Tunumi 1960-ikkunnut kingumut qiviariarta.

Piffissami tassani danskit naalakkersuisuisa Kalaallit Nunaat pillugu Ataatsimiititaliaq pilersippaat, issittumilu ilisimatusartup Ejner Mikkelsenip Tunumi naalagaaneranit ukiut qulit qaangiuttut.

Dines Pike inuusuttuulluni mittarfeqarfimmi Nerlerit Inaaneersunit piniartunik peqateqarluni nannunniartilluni nalinginnaanngitsumik tupannartumillu siumugaqarpoq:

- Inuup niaquata saarnginik takuvunga. Nunaannarmiipput. Eqqaamavara niaqqut saarngi marluusut. Aappaa inersimasup niaquata saarnga, aappaalu mikivoq. Eqqarsarpunga immaqa meeqqap niaquata saarnga, Dines Pike AG-mut oqaluttuarpoq.

Dinesip tupaqqalluni piniartut allat qiviarpai. Suunuku takugai?

- Niaqqup saarngi putuaraqarnerat eqqumiinnerpaavoq, allaanngilaq aallaaneqarsimasut, Dines Pike oqaluttuarpoq.

Piniartut allat niaqqut saarngisa tassaniinnerat soorlu ilisimareeraat.

Taassuma oqarnera naapertorlugu oqaluuserineqarusuppasinngillat. Kimulluunniit. Tassa apeqquserneqassanngitsut, aamma puiguinnarneqassasut.

- Ukiorpassuarnilu taamaaliorpunga. Oqaluuserisanngilakka, kisianni Ittoqqortoormiini kikkut tamarmik niaqqut saarngi pillugit ilisimasaqartut qularinngilara. Kingusinaannginnermi maanna taakku pillugit oqaaseqarnissaq piffissanngorpoq, taanna oqaluttuarpoq.

Dines Pikep oqarnera naapertorlugu niaqqut saarnginik nassaarfiani illukut arfineq-marluunngikkunik arfineq-pingasuupput. Tamanna kingusinaareersinnaavoq. Niaqqut saarngi ukiut 50-it missaanni takusareerlugit ukiut marlussuit matuma siorna tammariasaarput, taakkulu takoqqissimanngilai.

Misissornissaannut piffissanngortoq

- Sumiiffimmi illukoqarnera aamma inuit niaquisa saarnginik peqarnera nassuiaruminaappoq, Dines Pike oqarpoq, nangillunilu:

- Illukut eqqaanni sakkukunik nassaarnikuuvugut. Kisianni suunersut iluamik ilisimanngilakka. Immaqa piniarnermut atortuusimassapput, taanna oqarpoq, nassaanilu nassuiaruminaatsunit mobiliminit assinik takutitsivoq.

Sumiiffik pillugu Dines Pike oqaluttuanik assigiinngitsorpassuarnik tusagaqartarsimavoq.

- Nannunniartut ilaasa sumiiffimmi qanittumi inoqanngikkaluartoq nilliarpaluttoqartoq qiarpaluttoqartorlu tusaasaraat tusarnikuuara, taanna oqaluttuarpoq.

Dines Pike assut eqqarsarpoq: Sooruna niaqqup saarngi aallaaneqarsimasutut isikkoqartut illukut eqqaaniittut? Sooruna oqaluuserineqarnissaat inerteqqutaasutut misiginartartoq?

- Illukut ilisimasakka naapertorlugit misissorneqarnikuunngisaannarput. Niaqqut saarngi illukullu arlaatigut imminnut attuumassuteqarnersut eqqarsaatigiuartarpara, Dines Pike oqaluttuarpoq.

Sumiiffimmi misissuisoqarnissaa piffissanngortoq, taanna isumaqarpoq.

- Taakku misissoqqissaarneqarnissaat pingaaruteqarluinnarlunilu pisariaqarpoq. Taamalilluta immaqa qanoq pisoqarsimanersoq aamma qanoq toqusimanersut paasisinnaavarput. Isaannarmik takullugu allaannginnami toqutsisoqarsimasoq, taanna oqarpoq, nangillunilu:

- Toqutsisoqarsimappat kiap aallaasimassavai? Taamatut pisoqarsimanngitsuuppat tunumiut amerlanerusimassagaluarpugut? Eqqarsaatit amerlapput.

Ittoqqortoormiini innuttaasoq alla aamma Dines Pikep takunniffiata nalaani niaqqup saarnginik nassaarsimavoq. Tassa Scoresby ”Inuuda” Hammeken, Ittoqqortoormiini aamma najugaqartoq.

- Niaqqut saarnginik pingasut missaanniittunik siumugaqarnikuuvunga. Aamma taakku siutaasa nalaanni putoqarput, 60-inik ukiulik Scoresby ”Inuuda” Hammeken AG-mut oqaluttuarpoq.

Dines Pike assigalugu aamma taakku oqaluuserineqartannginnerannik misigisaqarsimavoq.

- Ittoqqortoormiiniittut tamarmik tassaniittut ilisimagaat ilimagaara. Oqaluuserineqartanngillat. Aamma sooq tassaniinnerat pillugu tusatsiakkanik amerlasuunik tusagaqartarpunga. Iluamik nassuiaanneqarsinnaanissara kissaatigigaluarpara, taanna oqarpoq.