Tunumi timmisartuussisarnerit kinguaattoortarnerat takornariaqarnermut inuussutissarsiornermullu eqquisartut

Demokraatini qinikkatut misilittagartuup Justus Hansenip Tunumi attaveqaasersuutitigut ilungersunartut ilisimalluarpai.

Ukiunimi kingullerni 20-ni illoqarfiup Tasiilap, qeqertap Kulusuup – Tunup nunanut allanut timmisartuussisarnermi mittarfeqarfiata inissisimaffigisaata – aamma Nuup akornanni timmisartukkut angalasartorujussuugami – tassa Inatsisartuni aamma Kommuneqarfik Sermersuup kommunalbestyrelsiani ilaasortatut.

Islandimut attaveqarunnaartoq 

Timmisartuussisarnerit maannakkut immikkut tatineqarput, tassami Icelandairip Reykjavikip aamma Kulusuup akornanni timmisartuussisarnini decembarimi unitsereeraalu, Tunumi Air Greenlandip sapaatip akunneranut pingasoriarluni Nuup aamma Kulusuup akornanni timmisartuussisarneri pisariaqartinneqarluinnalerput, taakkulu 2025-mi qaammatini pingasuni siullerni allanngorarsimaqaat.

– Sila unerisimanngissimaqaaq taamaattumillu timmisartuussinerit amerlasuut taamaatiinnarneqarsimallutik. Ukiuunerani takornariartitsisarnerput, Tunumi aningaasaqarnitta tunngaviusut ilaat, ilungersunartorsiorpoq. Tamatuma saniatigut nioqqutissat nerisassat akii qaffariarujussuarsimapput, nioqqutissanik Islandimeersunik pissarsisoqarsinnaajunnaarnera pissutigalugu. Maannakkut iipilimut ataatsimut Nuummit tikisinneqartartumut 15-16 koruuninik akiliisariaqalerpugut, naak iipili ataaseq Islandimeersoq siornatigut 10 koruunilerlugu pisiarisinnaasaraluarlugu. Aamma poortukkat nassiunneqartut kinguaattoortarput, suut tamarmik Nuuk aqqusaarlugu tikittartussaammata. Taamatuttaaq biilit, qamuteralaat allallu assigiinngitsut taartissaannik piniaraangatta, tikinnissaat qaammatini arlalinni utaqqisariaqartalerpavut. Tamanna inuussutissarsiortunut innuttaasunullu sunniuteqaqaaq, Justus Hansen oqarpoq.

Timmisartuussisarnerit allanngorartuartut

Justus Hansenip Tasiilaq pingaartitarilluinnarpaa, tamaanimi inunngorlunilu peroriartorami, aamma ilaquttanilu najugaqarfigaa. Ukioq mannami januaarip aallaqqaataannit kommunimi ingerlatsinermut pisortanngorami, tappavani akisussaaffigilerlugit teknikimut tunngasut, ingerlatsinermut tunngasut aamma aserfallatsaaliinermut tunngasut. Taama atorfeqalernerminut tunngatillugu Kommuneqarfik Sermersuumi ineriartornermut sanaartornermullu ataatsimiititaliamut siulittaasutut tunuarpoq.

- Timmisartuussisarnerit allanngorartuartut Tunumi inuiaqatigiinnut tamanut sunniuteqangaatsiartarput, taamaattumillu politikikkut sulissutiginiarpara, Tunumut angallassisarneq tatiginarnerussasoq, Justus Hansen oqarpoq, taassumalu piffissami siullermi kissaatigaa, Air Greenlandip ukiuunerani Nuummit Kulusummut sapaatip akunneranut marloriarluni timmisartuussisarnini atuleqqissagaa, taamaalilluni Icelandairimut patajaatsumik timmisartuussisartumut inissaqaqqilersinnaassammat. Piffissami ungasinnerusumi Tasiilami mittarfiliortoqarnissaa anguniarneqarpoq, taamaalilluni Kulusummi mittarfik aqqusaarneqartarunnaassalluni. - Tassami Tasiilami mittarfiliortoqarnissaanik neriorsorneqareerpugut, taamali pisoqarnissaa aatsaat ukiut arlallit qaangiuppata pisinnaassaaq, oqarpoq.

Akit qaffasissorujussuit 

Akisupallattoqarnera Nuummiit Kulusummut Tasiilamullu timmisartuussinerit kinguaattoortarnerisa saniatigut aamma akisupallapput, maannalu bilitsi nalinginnaasoq akikinnerpaaq utimut 14.000 koruuningajannik akeqartarpoq. Ilaqutariinnut sisamanut aningaasartuut 50.000 koruunit sinnerlugit ake

Nuummit Kulusummut Tasiilamullu timmisartuussisarnerit kinguaattoorfiusarnerisa saniatigut aamma akisoorujussuupput. Siumut utimullu billeti nalinginnaasoq maanna 14.000 koruuneqarpoq. Ilaqutariit sisamanik inuttallit taama angalaniarunik 50.000 koruunit sinnerlugit aningaasartuuteqassapput.

- Tamatuma aamma takutiinnarpaa, pisortat aningaasaataat kisimik kaaviiaartinneqartartut. Takornariat allallu Tasiilamik misigisaqarusuttut akissaqanngillat, misigisimallutillu Tasiilamut angalaniarneq ajornakusoortorujussuusoq, tassami Nuuk aqqutigeqqaartussaagamikku. Tamatuma saniatigut kinguaattoortarnerpassuit uteqqinnissamut toqqissisimanngissutaasarput. Angalasunik takoreerpugut Nuummut angerlarnissaminnut ulluni 14-ini Kulusummi utaqqisinneqartunik ingerlaqqinnissaminnillu taamaatitsiinnartunik. Maanna aaqqissuussinerup kinguneranik takornariat maanga tikittartut ikiliartorusaarput, Justus Hansen oqarpoq.