Tunup avannaani angalanissaq mianersoqqussutigineqartoq
Ella Ø-p kitaaniittoq Dickson Fjord aamma Tunup avannaani nunap allanngutsaaliukkap Upalungaarsimanermut ataatsimiititaliarsuup ulorianartutut nalilermagit Naalakkersuisut sumiiffimmi angalaqqusiunnaarput.
Dickson Fjordimi 2023-mi tassaarsuarmat Siriusip alapernaarsuisuisa Issittumilu Sakkutooqarfiup atortuisa ilaat imaanut saavipput.
Assi: SIRIUS/ Arktisk Kommando
Naalakkersuisut Tunup avannaani angallannermut mianersoqqusipput.
Dickson Fjordimi Ella Ø-p kitaaniittumi angallattoqannginnissaa Naalaakkersuisut tusagassiuutitigut nalunaaruteqarlutik kaammattuutigaat.
Upalungaarsimanermut Ataatsimiititaliarsuup innersuussinera tunngavigalugu taama nalunaaruteqartoqarpoq.
Naalakkersuisut Tunup avannaani nuna allanngutsaaliugaq tamaat angalaffissatut navianartutut nalilerpaat, tassanilu angalanermi mianersortoqarnissaa eqqumaffigineqaqqullugu.
Qaqqap qajannaassusaa qularutigineqartoq
Dickson Fjordimi qaqqap 2023-mi sisoorujussuartup tunuaniittup qajannaassusaa qularutigineqarpoq.
- Taamaammat Upalungaarsimanermut Ataatsimiititaliarsuaq Naalakkersuisunut inassuteqaateqarpoq, Ella Ø-p kitaani Dickson Fjordimi angallattoqannginnissaanik siunnersuuteqaqqullugit, Naalakkersuisut allapput.
2023-mi qaqqap sisoornera tassaarsuarujussuarneranik kinguneqarsimasooq, ilaatigut mallit 200 meterisut portutigilersarlutik, ilisimatusartut inerniuliutiginikuuaat.
Tassaarsuaq ulluni qulingiluani kangerluit marluk akornanni uteqattaarsimapput, immallu aalanera nunarsuup sinnerani malugineqarsinnaasimavoq.
Nuna allanngutsaaliugaq tamarmi navianartutut nalilerneqarpoq
Tunup avannaaniittoq nunami allanngutsaalikkami angalaneq ulorianartutut nalilerneqarmat nunakkut immakkullu angalanermi mianersornissaq pingaaruteqarpoq.
Upalungaarsimanermut Ataatsimiititaliarsuup naliliinerata kingorna aamma tamanna pivoq.
Upalungaarsimanermut Ataatsimiititaliarsuup imaani uuttortarneqanngitsumi angallanneq aarlerinaqisoq nalilerneqartoq, nalunaarummi allassimavoq:
- Tunup avannaani nunami allanngutsaaliukkami silap allanngoriasaarsinnaanera ilisarnaataavoq, tamannalu angallannikkut aarlerinartorsiornissamut annerulersitsivoq annaassiniarnernilu ajornakusoortitsinerusinnaalluni.
- Kiisalu piffik inoqanngitsumiippoq isorartuneratalu annaassiniartartut qisuariarnissaasa kigaappallaarnerannik kinguneqarsinnaavoq.
Sumiiffimmili angalanissamik akuersissummik suli tunniussisoqarsinnaavoq.
