Tusagassiorfik aviisinik pisartagalinnut periarfissanik amerlanerusunik pilersitsivoq
Aviisit pisiniarfinni suli saqqummertinnagit Tusagassiorfimmit Sermitsiamit aviisinik pisartagallit saqqummertut nittartakkatigut pissarsiarisinnaalerpaat.
Leiff Josefsen
Aviisinik pisartagalinnut periarfissanik amerlanerusunik tusagassiorfik Sermitsiaq maanna pilersitsivoq.
Silarsuarmi digitalinngorsaaviunerusumi internettimillu atuisut amerliartuinnarneranni, aviisiinik, Sermitsiamik AG-millu pisartagallit allaaserisat tusagassiorfimmit saqqummersinneqartut atuarsinnaalerpaat.
Allaaserisat aviisini saqqummersinneqartut nittartakkami Sermitsiaq.gl-imi aamma saqqummersinneqartalissanerinik tamanna isumaqarpoq.
- Ussassaarutinut tuniniaavik nalinginnaasumik aviisinik aningaasalersuisartoq internetip nassaarineqarsimaneraniilli inoqatinut attaveqaatinit teknologiimillu suliffeqarfissuarnit allanit tiguarneqarmat, nunarsuaq tamakkerlugu aviisit tusagassiuutillu tatineqarput.
- Taamaattumik aviisit pilerfiat uterteqqittariaqarparput, nutaarsiassaativut imarisaallu akilersittalerlugit. Taamaattumik atuisutut nutaarsiassanik allaaserisanillu pissarsiniarlutit pisartagaqalertariaqarputit. Maannakkut tamanna mobilikkut, iPadikkut qarasaasiakkullu pissarsiarineqarsinnaavoq, nutaarsiassallu, allaaserisat Sermitsiaq.gl-imilu imarisat tamaasa pissarsiarisinnaavatit, tusagassiorfiup nittartagaani akiliilluni aviisinik pisartagaqalernissamut saqqummiussinermut atatillugu, tusagassiorfimmi Sermitsiaq.gl-imi pisortaaneq aaqqissuisuunerlu Masaana Egede oqarpoq.
