Tusagassiorfik: Danskit sanaartugassanik suliassinneqartartut Amerikamiut Kalaallit Nunaanni sakkutooqarfigisimasai iluanaaruteqarfigerujussuarsimavaat

Tusagassiorfik Jyllands-Posten naatsorsuutinik danskit sanaartugassiissutinik suliassinneqartartut USA-p Kalaallit Nunaanni suliaqarsimanerannut tunngasunik allagaataasivinni misissuinermi nassaarpoq.

Danmarkimi atorfilittat nunaqqatimik sanaartugassiissutinik suliassinneqartartut iluanaaruteqarnissaannik qulakkeerisussanik isumaqatigiissuteqarnissamut kimigiisertarsimasut, naatsorsuutit allagaatillu isertuussat naqissusersimasallu Naalagaaffiup allagaateqarfianeersut takutikkaat, Danmarkimi aviisit ilaat Jyllands-Posten allappoq.

Tamatumani pineqartoq tassaavoq danskit sanaartugassiissutinik suliassinneqartartut ingerlatsiviisa kattuffiat Danish Arctic Contractors (DAC), danskit sanaartugassiissutinik suliassinneqartartut ingerlatsiviinit arfinilinnit 1952-imi pilersinneqartoq.

DAC 1953-ip 1984-illu akornanni iluanaarutigisimasai ullutsinni aningaasat nalingi naapertorlugit 13 milliardit koruunit missilioraat, tassa ukiumut 400 millionit koruunit missaannik iluanaaruteqartarsimasoq, Jyllands-Postenip naatsorsuinerata takutippaa.

Aningaasartuutigisimasai tamarmik naatsorsuinermi ilanngaatigineqarput. Tassa aningaasaqarnikkut ingerlatsinikkut suliaqarnikkut iluanaaruteqangaatsiarsimasut, Aningaasaqarnermut Siunnersuisoqatigiit siulittaasuat aningaasaqarneq pillugu aamma ilisimatuujusoq Torben M. Andersen aviisimut Jyllands-Postenimut oqarpoq. Ingammik Kalaallit Nunaanni:

- Amerikamiut Kalaallit Nunaanni sakkutooqarfigisimasaat politikkikkuinnaanngitsoq aammali aningaasaqarnikkut ingerlatsiffiusimasut paasinarsivoq. Tassa uUkiorpassuarni taamaaliorsimapput, Torben M. Andersen Jyllands-Postenimut danskit sanaartugassanik suliassinneqartartut nunatsinni sakkutooqarfiusimasuni suliaqartarsimanerat pillugu oqarpoq.

Jyllands-Postenip paasisai DR-ip piviusulersaarusiaani oqallisaaqisumi tassa ´Grønlands Hvide Guld´-imi saqqummiussanut assinguvoq.

Tassa Danmarkip Ivittuuni orsugiassiorfiusimasoq qanoq iluanaaruteqarfigisimatigineraa, piviusulersaarusiami tassani sammineqarpoq. Piviusulersaarusiami tassani naatsorsuinerit qularnartoqartinneqarmata, DR-ip piviusulersaarusiani taanna nittartakkaminit peerpaa.