Tusagassiorfik: Jakob Larsen Folketingimi ilaasortanngorusuppoq
Trumpip Kalaallit Nunaata tiguarnissaa pillugu oqaaseqaqattaarnera assammik arsartartut sungiusaasuata politikkikkut anguniagaqarusulerneranik kinguneqarpoq.
Jakob Larsen assammik arsartartuusimavoq. Kalaallit Nunaat sinnerlugu assammik arsarluni nunarsuarmi pissartanngorniunnerni pingasuni peqataanikuuvoq. Nykøbing Falster Håndboldklubimut maanna sungiusaasuuvoq.
Assi: Knud Fl. Larsen
Nykøbing Falsterimi ulluinnani assammik arsarnermi sungiusaasuuvoq, ingerlalluarunili Folketingimi ilaasortanngussaaq.
Jakob Larsen Maniitsumi inunngortoq Kalaallillu Nunaannilu peroriartortoq Radikale Venstre sinnerlugu Fynimi folketingimut qinigassanngortippoq.
Aviisi Fyens Stiftstidende allappoq.
USA-p præsidentiata Donald Trumpip Kalaallit Nunaat pillugu oqaaserisai tusartareerlugit politikkimut akuliunnissaminut aamma Danmarkip Kalaallit Nunaatalu akornanni attaveqatigiinnermik ineriartortitsinissamut piumassuseqalerpoq.
Kunngeqarfik tamaat sukataarluni sullinniaraa
Naalakkersuisunut siulittaasuusimasup Múte B. Egedep ukiortaami oqalugiaataa, ilaatigut namminiilivinnissaq pillugu, isumassarsissutigaara.
- Kalaallit Naalagaaffeqatigiikkunnaarnissamik maanna piareertut Danmarkimi amerlasuut isumaqarput. Trump aamma taama isumaqarpoq, taamaattoqanngilarli, Jakob Larsen Fyns Stiftstidendemut oqarpoq.
Folketingimut qinigassanngortittutut nunarsuup toqqissisimanartunngorteqqinneqarnissaa pitsaasunngorteqqinneqarnissaalu sukataarutissallugit Facebookimi allappoq.
- Fynimi minnerunngitsumillu kunngeqarfimmi tamarmi suliniuteqarnissarput qilanaaraara.
Folketingimut qinersineq tulliuttoq kingusinnerpaamik 2026-mi oktobarip qaammataani pissaaq.
