Tusagassiorfik: Trumpip nunatsinni inummut ataatsimut 10.000 $-it tunissutiginiarai
Kalaallit Nunaanni innuttaasut USA-mut ilanngunnissamik akuersitinniassaat anguniarlugu Præsidentip illorsuani pilersaarusiortoqarpoq. Danmarkimiillu ataatsimoortumik tapiissutit taarserlugit Kalaallit Nunaanni innuttaasumut ataatsimut 10.000 dollarinik neqeroortoqarsinnaanera eqqarsaatersuutigineqartoq New York Times allappoq.
USA-p præsidentia Donald Trumpip arlaleriarluni oqaatigaa USA-p pisariaqartikkaa Grønlandip piginnittuuneranik aqunneqarneranillu pissarsinissaq nunap iluani nunarsuarmilu sillimaniarnermut tunngatillugu.
Foto: Nathan Howard/Reuters/Ritzau Scanpix
Donald Trumpip Præsidentillu illorsuani atorfilittat USA-p Kalaallit Nunaannik aqutsilersinnaanera qanoq anguneqarsinnaaneranik pilersaarusioraat Amerikamiut tusagassiuutaata New York Times-ip sisamanngornermi allaaseraa.
Tusagassiorfiup præsidentip illorsuani tusarfiata sakkutuulersornissaq pilersaarutinut ilaanngitsoq paasissutissiissutigaa.
Akerlianilli Kalaallit Nunaata USA-mut ilanngunnissaa isumassarsiatsialaanera pillugu qularunnaarsitsiniaasoqassaaq. Inuit attaveqaqatigiittarfiisigut ussassaarnikkullu ilaatigut taamaaliortoqassalluni.
New York Times naapertorlugu Amerikamiut aamma aningaasatigut tapiisinnaaneq eqqarsaatersuutigaat, ilaatigut Kalaallit Nunaanni innuttaasut tamarmik Danmarkimit ataatsimoortumik tapiissutinik pisartagaqartarnerat taarserniarlugu ukiumut 10.000 dollarinik (70.000 koruunit missaanniittut) tapiiffigineqartarnissaat siunnersuutigineqarluni.
Trumpip naalakkersuisuini atorfillit naapertorlugit innuttaasunut tamanut aningaasartuutit taakku Kalaallit Nunaata pinngortitami pisuussutaasa aningaasarsiorfiginerisigut matussuserneqarsinnaasut New York Times allappoq.
USA-p Kalaallit Nunaannut aningaasatigut neqerooruteqarsinnaanermik eqqarsaateqarnera aviisimi The Washington Post-imi sapaatip-akunnerani kingullermi allaaserineqarpoq.
Tusagassiiviup aamma allaaserisarpaa Illorsuup Qaqortup misissornera, qanoq akeqassanersoq Kalaallit Nunaata ingerlatsinera, aamma qanoq pinngortitami pisuussutit iluaqutigineqarsinnaanersut.
Kalaallit Nunaata akisussaaffigineqarnera qanoq akeqassanersoq aamma pinngortitap pisuussutai qanoq aningaasarsiorfigineqarsinnaanersut præsidentip illorsuanit misisissuiffigineqartoq tusagassiorfiup allaaseraa.
Washington Post-imi allaaserisap saqqummerneraniit ullualuit qaangiuttuut præsidentip tulliata J. D. Vancep tusagassiorfimmit Newsmaxi-mit apersorneqarluni aningaasat taakkununnga tunngassutillit pillugit oqaaseqarpoq.
Kalaallit Nunaat USA-mi isumannaallisaanermut pingaaruteqarmat USA-p “kalaallit aningaasanik amerlanerujussuarnik tunisinnaagai” Donald Trumpi oqarsimasoq USA-p præsidentiata tulliata oqaatigaa.
