Tusagassiorfik: USA Kalaallit Nunaannik piginnittuunissaminut aningaasartuutissani misissorpai
Tusagassiorfik naapertorlugu Det Hvide Husimi Kalaallit Nunaata ingerlanneqarneranut aningaasartuutit nalilersorneqarput.
Sapaatip akunnerani kingullermi USA-p vicepræsidentia J. D. Vande Kalaallit Nunaannut tikeraarpoq.
Assi: Jim Watson/Reuters/Ritzau Scanpix
USA Kalaallit Nunaannik takkutiginnilissagaluarpat, qanoq tamatuma akineqarnissaa pillugu Det Hvide Hus missingersuusiuleruttorpoq.
Taama inuit pingasut aterminnik taaseqqusinngitsut, suliamulli ilisimasallit The Washington Postimut oqarput.
Tamatumani ilaatigut Kalaallit Nunaata innuttaanut pisortat ikiorsissutaannut aningaasartuutit pigineqartut, tusagassiorfiup tusarfii oqarput.
Taamattaaq Amerikami naalagaaffiup karsia Kalaallit Nunaannit pinngortitamit pisuussutinik qanoq isertitsisinnaanera atorfilittat nalilersuleruttorpaat.
Danmarkimit pitsaanerusumik Kalaallit Nunaanni Naalakkersuisunut neqerooruteqarnissaq periarfissaasoq tusarfiit oqaatigaat.
Danmarki ukiumut ataatsimoortumik tapiissutinik 4,1 milliard koruuninik amerlassusilinnik Kalaallit Nunaannut nassiussisarpoq.
- Taakkunannga amerlanipilussuusut, atorfilittaq aterminik taaseqqusinngitsoq oqarpoq.
Tusarfiit pingasut atimik isertuunneqarnissaa tunngavissaatillugu oqaaseqarput.
- Oqariartuut tassaavoq: “Danmarkimit annertunermik akilerniarpatsigit”, tusarfiit ilaat oqarpoq.
Danmarkip ataatsimoortumik tapiissutit saniatigut ukiumut 1,5 milliard koruunit politiinut eqqartuussiveqarnermullu kiisalu tapiissutinut allanut akiliutigisarpai.
USA-p præsidentia Donald Trump, arlaleriarluni USA-p “Kalaallit Nunaat piumaaraa” oqarpoq.
- 100 procent, sapaatiummat NBC Newsimut oqarpoq.
Ilassutigalugulu “sakkutuulersornani taamaaliornissamut periarfissaqarluartoq” oqaatigaa, taamaattoqannginnissaanilli oqarumanani.
- Siunnerfikka ilanngarnianngilakka, præsidenti oqarpoq.
Kalaallit Nunaanni naalakkersuisut siulittaasortaavata Jens-Frederik Nielsenip USA-p Kalaallit Nunaat tigunavianngikkaa, sapaatiummat oqaatigaa.
