Tusagassiorfik: USA-mi atorfilittat Kalaallit Nunaat immikkut isumaqatigiissummik neqeroorfigissallugu isumaliutigaat
Kalaallit Nunaata kiffaanngissuseqartumik associeringsaftaleliorfigineqarnissaanik Trumpip naalakkersuisuini isumaliuteqartoqarpoq.
Assi: Kent Nishimura/Reuters/Ritzau Scanpix
Amerikamiut atorfilittat Kalaallit Nunaata naalakkersuisuisa USA-mik kiffaanngissuseqartumik associeringsaftaletut taaneqartumik ((Compact of Free Association, aaqqiss.) isumaqatigiissusiorfiginissaanik neqeroorfiginissaat isumaliutigaat.
Taama Amerikamiut atorfilittat marluk inullu alla isumaliuteqarnernik ilisimasaqartoq nutaarsiassaqartitsivimmut Reutersimut oqarput. Inuit aterminnik taasillutik saqqummiussinngillat.
Isumaliutit pisortatigoortumik uppernarsarneqanngillat.
Amerikamiut præsidentiat Donald Trump, qaammatini arlalinni Kalaallit Nunaannut annertuumik soqutiginninnerminik oqaaseqartarpoq, sakkutuulersorsinnaanerullu pisinnaanera tunuartikkumanagu. Kalaallit Nunaata pisiarinissaa aamma siunnersuutigisimavaa.
Danskit kalaallillu naalakkersuisuisa Kalaallit Nunaata USA-mit tiguneqarsinnaanera sakkortunerpaamik akerlilerpaat.
Kiffaanngissuseqartumik associeringsaftaleqarnikkut Kalaallit Nunaat USA-mut ilanngutitinneqassanngilaq.
Amerikamiut naalakkersuisui Mikronesiamik, Palauimik Marshallillu qeqertaanik taamaattunik associeringsaftaleqarpoq.
Isumaqatigiissut taamaattoq nunamit nunamut assigiinngissinnaasarpoq, tamatumali assersuutigalugu USA-p inuiaqatigiinni ingerlatsinernik pingaarutilinnik isumaginninnera, USA-llu sakkutuuisa nunami pineqartumi killilersorneqarnatik najuussinnaanerat kingunerisinnaasarpaa.
Danmarkip USA-llu illersornissaq pillugu isumaqatigiissutaanni 1951-meersuni Amerikamiut Kalaallit Nunaanni annertuumik najuussinnaaneerput, killilersorneqarnatillu sakkutooqarnikkut najuunnerminnik annertusisitsisinnaareerlutik.
Tusarfiit kinaassutsiminnik isertuussisut kiffaanngissuseqartumik associeringsaftaleliorsinnaanermik pilersaarut arlalinnik ajornartorsiuteqarfiusinnaasoq nassuerutigaat. Pilersaarulli taanna USA-mi kisiat isumaliutigineqanngilaq.
Det Hvide Husip, Danmarkip Washington D.C.-mi aallartitaata Kalaallilluunniit Nunaata sinniisoqarfia Reutersip saaffiginnissutaa uterfiginngilaat.
