Tusagassiortoq imaannaanngitsoq toqukkut qimaguppoq
Tusagassiortoq imaannaanngitsoq Elna Egede napparsimareerluni 70-inik ukioqarluni toquvoq.
Elna Egede Carsten Nielsen-legatimik 2008-mi tusagassiortut nersornaasiuttagaanik pissarsivoq, ineqarnermut piginnittunngorniunnermi allaaserisai saqqummiussaalu pillugit.
Ukiorpassuarni tusagassiortutut imaannaanngitsutut sulisimasoq Elna Egede toquvoq. Taamak ilaqutai Facebookimi ilisimatitsipput.
Elnap toqunerani inuinnaat naapittarfiini ilaatigut suleqatigisimasaasa, Elna Egedep Kalaallit Nunatsinni tusagassiornermi pingaaruteqarnera pillugu eqqaaniaallutillu nersorinnipput.
Politikerittaaq Elna Egede eqqaaniarpaat. Taamaalilluni IA-p siulittaasorisimasaa, ukiorpassuarnilu politikeriusimasoq Aqqaluk Lynge aaqqissuisoqarfimmut matumunnga eqqaaniutinik nassiussivoq.
Taassuma Elna Egede Kalaallit Nunatsinni politikikkut ilanngutassiortuni nuimanerpaasimaneranik eqqaaniarpaa:
- KNR-imi naqitatigullu tusagassiorfinni sulisimavoq, ilisimasaqarluarluni politikikkut pisut assigiinngitsut allaaserisarpai, politikerillu toqqaannartumik pissuseqarfigisarlugit.
- Inuiaqatigiit Elna sammisat pillugit politikerinik qulaajaallaqqinneranik eqqaamassavaat. Politikerilli amerlanerit Elnap suliai ataqqisorujussuuaat. Elna inuttut aamma imaannaanngitsuuvoq ataqqineqarlunilu, ikinngutiminillu ilaquttaminillu asaneqartuulluni, Aqqaluk Lynge oqarpoq.
- Arnaq immikkuullarissoq
Elna Egede 2008-mi attartortumit piginnittumut suliami politikerit nuimasut Nuummi inissianik pilerigineqartunik pisisimanerat pillugu allaaserisani qulaajakkanilu pillugit Dansk Journalistforbundip Carsten Nielsenimik nersorinnissutaanik nersornaaserneqarpoq.
Elna aamma Naalakkersuisut Siulittaasuannit Múte B. Egedemit eqqaaniarneqarpoq, taannalu ima oqaaseqarpoq:
- Elna Egede arnaavoq immikkuullarissoq tamatigut naapertuilluartoqarnissaanik ujaasisoq. Pikkorissuuvoq, alapernaatsuulluni malartitassaananilu. Assoralisimaarnissamut sapijaatsuuvoq, immikkullarissumillu nukittussuseqarluni, Múte B. Egede oqarpoq.
Elna Egede ukiuni inuuffigisamini kingullerni uinilu Søren Wettergren Olsen Aalborgimi najugaqarput.
Elna ulloq 25. maj nalunaaqutaq marlunut Vejgaard Kirkimi ilisaassaaq, Søren Wettergren Olsenilu tassunga tunngatillugu ima kissaateqarpoq:
- Elnap kalaallisut tussiartoqarnissaa kissaatigisorujussuuaa, erinarsoqatigiinnilli amigaateqarpunga, taanna Sermitsiamut oqarpoq. Søren oqarasuaatip normua +45 42 55 92 28 atorlugu saaffigineqarsinnaavoq.
