Tusagassiuut: Silaannakkut illersornissaq pillugu Trump aamma Zelenskyj telefonikkut oqaloqatigiipput
USA-mi Ukrainemilu præsidentit silaannakkut illersornissaq Ruslandillu saassussinera sakkortusiartuinnartoq oqaluuserivaat, Axios nalunaarpoq.
Ukrainemi præsidenti, Volodymyr Zelenskyj, aamma amerikamiut præsidentiat, Donald Trump, ilaatigut ataatsimoorussamik illersornissamut tunisassiorsinnaaneq oqaluuseraat.
Asseq (toqqorsivimmit): Handout/Ritzau Scanpix
Ukrainemiut præsidentiat, Volodymyr Zelenskyj aamma Amerikamiut præsidentiat, Donald Trump tallimanngornermi telefonikkut oqaloqatigiipput.
Taamak nalunaarpoq Amerikami tusagassiorfik Axios.
Zelenskyjp sulisuisa pisortaat, Andrij Jermakip, Reuters naapertorlugu, uppernarsaavoq Zelenskyjp præsidenteqatiminik oqaloqateqarsimasoq, kisianni kina oqaloqatigisimaneraa atiatigut taanagu.
Jermak oqarpoq, "præsidentit akornanni pingaarutilimmik oqaloqatigiinneq" pisimasoq.
Axios naapertorlugu Zelenskyj aamma Trump oqaloqatigiinnermi eqqartorsimavaat Ruslandip Ukrainemut saassussinera sakkortusiartuinnartoq aamma Ukrainemut silaannakkut illersornissamut atortunik nassiussisinnaaneq.
Oqaloqatigiinneq pivoq, Trumpip Ruslandip præsidentia, Vladimir Putin, oqarasuaatikkut oqaloqatigereernerata aqaguani.
Putinimik oqarasuaatikkut oqaloqatigiinneq Trump naapertorlugu iluatsinngilaq.
- Putinimik ullumi oqaloqatigiinnera assut narrujuumminartuuvoq, tassami isumaqarpunga taanna paaseqatiniaruminaatsoq, tamannalu assut pakatsinarpoq.
- Oqarfigiumavassi, isumaqarpunga taanna unitsitsinissaminik pilersaaruteqanngitsoq, tamannalu assut ajuusaarnarpoq, Trump Washington D.C.-mi tusagassiortunut oqarpoq.
/ritzau/
