KL

DK

ILLERSORNISSAQ PILLUGU ISUMAQATIGIISSUTIP ILASSUTAA 2

TUSASS-imi nuannaarput: Immap naqqatigut kabeli nutaaq 3 milliarder koruuninik naleqartoq qulakkeerneqarpoq

Nunatta, Savalimmiut aammalu Danmarkip akornganni immap naqqatigut kabelimik sanaartornissap aningaasalersorneqarnissaanut, illersornissamut isumaqatigiissutit aappaanni inissippoq (Issittumi Altantikullu imartaani avannarlermi isumaqatigiissutip aappaani). Ingerlatseqatigiiffiup pisortaanera Toke Binzer nuannaarpoq oqilisimaarlunilu, ingerlatseqatigiiffik nalunaarpoq.

Danskit aningaasanut inatsisaatigut aningaasaliinerup inissinneqarnerata kingorna ukiut pingasut sisamalluunniit atorlugit kabeli nutaaq suliarineqassaaq.
Jensine Berthelsen tusagassiortoq
Saqqummersinneqarpoq

Ingerlatseqatigiiffimmi Namminersorlutik Oqartussanit pigineqartumi TUSASS-imi, telefonimik internetsimillu pilersuisumi, 100-iliinermut atatillugu 3 milliardit koruuninik naleqartumik immap ataani kabelimik tunineqarnissamit pitsaanerusumik kissaateqartoqarsinnaagunanngilaq.

- Pisoq tamanna tamatsinnut nuannerluinnarpoq. Immap naqqatigut kabeli nutaamik pilersitsinissaq isumaqarpoq siunissami nukittunerusumik inissisimalissasugut. Digitalimik attaveqaqatigiinneq uagutsinnut pingaaruteqaqimmat isumaqatigiissummi ilanngunneqarnissaa ilungersuutigisimavarput, Toke Binzer oqarpoq.

Isumaqatigiissutip ilassutaa 2-mi Atlatikup avannaani immap naqqatigut kabeli pillugu imatut allassimavoq

Issittumi Atlantikullu Avannaani immap naqqatigut kabeli aqqutigalugu periarfissat killeqarput.

Isumaqatigiissuteqartut aammalu Naalakkersuisut taamaammat isumaqatigiipput Atlantikup avannaani immap naqqani kabeli aapperneqassasoq, taassumalu Danmark aamma Kalaallit Nunaat atassusissavaa. 

Danskit naalakkersuisuisa aammalu  Savalimmiuni Naalakkersuisut piaarnerpaamik periarfissat oqaluuserissavaat, immap naqqatigut kabelip Savalimmiuni attaveqaatinut atassuserneqarsinnaanera pillugu. 

Immap naqqatigut kabeli nutaaq attaveqaqatigiinnermut nukittorsaataassaaq, illersornissaqarfiullu immikkoortuisa isumannaatsumik attaveqaqatigiissinnaaneranut periarfissanik pitsanngorsaataalluni. 

Taamatuttaaq immap naqqatigut kabeli nutaaq ajoqusernernut aserorterinernullu navianartorsiortitsinerup annikillisarneqarneranut iluaqutaassaaq.

Naalakkersuisut: Sakkutooqarfik

Qanimut suleqatigiinneq 

TUSASS, piffissangaatsiaq atorlugu aalajangiinissamut peqataasimasoq, qanimut suleqatigiinneq nunat kattuffiillu akornanni pitsaasumik ingerlammat naammagisimaarinnippoq. Ingerlatseqatigiiffiullu Naalakkersuisut Folketingimilu Kalaallit Nunaat pillugu ataatsimiititaliaq immikkut qutsavigai.

- Qanimut suleqatigiinneq nukittunerusoq ullumikkut angusaqarluarnitsitta nalliussinissaanut tunngavissiivoq. Politikerinut, atorfilittanut suleqatigisartakkanullu, suliami peqataasunut, qujarusuppunga, Toke Binzer oqarpoq.

Siunissamut pingaarutilimmik aningaasaliineq

Kabelip aningaasaliiffigineqarnera qulakkeerneqareerpat ukiut pingasut sisamalluunniit qaangiuppata kabeli pilersinneqassaaq. Kabelilu naammassineqarpat  - teknologi pillugu, inuiaqatigiinnut pilersaarusiornikkullu - piffissap nutaap aallartinneranut ersiutaassaaq, TUSASS-imit oqaatigineqarpoq.

Isumaqatigiissut 27,4 milliardit koruuninik naleqarpoq, taakkunannga 3 milliardit koruunit missaat immap naqqani kabelimut immikkoortinneqarput.

illersornissamut isumaqatigiissutip ilassutaa 2 immap naqqatigut kabeli inuiaqatigiit tusass

Atorfiit tamaasa takukkit

Powered by Labrador CMS