Tusassip atortunut attavii ajorsisut - sumiiffiit qaammataasamut attavillit eqqugaasut

OBS: Tusassip attaveqaatit aaqqittut marlunngormat ullaakkut nalunaarutigaa.

Spaniami Maspalomasimi attaveqaatinut attaveeruttoqartoq Tusassip ataasinngornermi unnukkut Facebookikkut nalunaarutigaa.

Maspalomasimit attaveqaasersuutit, qaammataasatigullu atuisunut attaviliisartutut atortugut pisariaqavissut attaveeruttut Tusass paasissutissiivoq.

- Maspalomasimut attaviliisarfiit atortakkagut arlallit ajoraluartumik tamaasa attaveqarfigisinnaanngilagut. Suleqativullu ilagalugit aaqqiiniarneq ingerlapparput. Tamatumalu saniatigut Spaniami innaallagiatigut qamittoortoqarsimaneranut attuumassuteqarsinnaanersoq paasiniaanermut ilanngullutigu, suliffeqarfik allappoq.

Qaanaami, Ittoqqortoormiini Tasiilami taakkualu nunaqarfii attaveqaataarupput.

Attaviit aaqqittut Tusassip marlunngornermi ullaakkut nalunaarutigaa:

- Nal. 00:36 Qaanaaq, Ittoqqortoormiit aamma Taasiilaq attaveqaqqilernissaat iluatsippoq. Sooq attavilersuutitsinnit attaveeruttoqarsimanera paasisaqarfigineroriarutsigu maanattaaq nalunaarutigiumaarparput, Tusass Facebookimi quppernermini allappoq.