Tusassip atuisuuffiit akilerneqarsimanngitsut matoorarniarai
Qaammatip aallartinnerani akiligassatit akilersimanngikkukkit sianersinnaajunnaarlutillu, sms-ersinnaajunnaassaatit data-millu atuisinnaajunnaarlutit.
Atuisut akiligassaminnik akiliisimanngitsut Tusassimit akiligassaminnik akileeqqusissummik pingasoriarlutik allaffigineqartassapput.
Tusassimi mobilimut internetimulluunniit atuisuunermut akiliut qaammatip naanerani akilersimanngikkukku qaammatip aallartinnera matuneqartalissapput.
Tusass nittartakkamini taama allappoq.
Inuit akiligassaminnik akiliisimanngitsut piffissami aalajangersimasumi killilimmik atuisinnaasaraluarput.
Tamaaliortoqartarunnaassasorli Tusassimi niuernermut pisortaq Nikolaj Christoffersen tusagassiuutinut nalunaarummi ima nassuiaavoq:
- Akiitsunik akiliinernillu suliaqarnitsinnut atatillugu torersaalluta aallartippugut. Tamanna pitsaasumik suliamullu ilisimasaqartutut ingerlanneqarsinnaaniassammat sullitatta akiliisimanatik atuisuuffimmik akeqanngitsumik atuisinnaanerannik unitsitsisariaqarpugut
Allagarsiat eqqaasitsissutit pingasut
Atuisuuffiit matuneqaraangata sianersinnaajunnaartoqartarpoq, sms-ersinnaajunnaarlunilu dataaruttoqartarpoq. Tusassilli nittartagaa aqqutigalugu akiligassaq akilerneqarpat atuisuuffik ingerlaannaq ammarneqaqqissaaq.
Tusassimit akiligassat akilerneqarnissaat pillugu eqqaasitsissummik pingasoriarluni allagarsisoqartassaaq. Qaammatip aallartinnerani ullormi siullermi, qaammatip taassuma naanerani kingullerlu qaammatit pingasut qaangiunneranni.
Allakkami kingullermi ulloq taaneqartoq sioqqullugu akiligassaq akilerneqarsimanngippat atuisuuffik matuneqartassaaq.
