Tusindtilikkaat Tuukkaq putsertukkoortoq malinnaaffigaat
Air Greenlandip timmisartuata pingasunngornermi ualikkut Atlantikoq qulaallugu angalasup ullut aappassaat utertinniarnera inuppassuarnit ernumagineqarpoq. Inuit tusindtilikkaat pissangallutik malinnaapput, ajunngitsumillu naaneqarpoq.
Timmisartoq imaq kangerluillu qulaallugit kaajallaasartoq Flightradar24-mit assilisami takuneqarsinnaavoq.
Nuummi sila putserlunilu isugutattoq pissutigalugu Air Greenlandip Atlantiku qulaallugu timmisartuutaa Tuukkaq Nuummut tikinngitsuussanersoq sivisuumik malinnaavigineqarpoq. Københavnimimi ilaaqqittut ullup aappassaa taamaaliortariaqalissappata pingasunngornermi ualikkut tamanna ingammik nuanniilliornartussaagaluarpoq.
Flightradar24-mi app-inilu allani atuisut timmisartup ingerlaarfia allanngoriartortoq takusinnaavaat. Timmisartoq pilersaarutit malillugit Nuummut tikippoq. Akunnerulli aappaata affaani kujammut, kitaanut avannamullu kaaviiaartariaqarpoq, iluatsinngitsumillu minniaraluarluni.
Piffissami tassani Nuummi silaannaq inuppassuarnit malinnaaffigineqarpoq. Tuukkaq kisimi aamma pineqanngilaq.
Screenshot flightradar24-imit
Piffissap ilaani illoqarfiit pingaarnersaanni Flightradar24-mit timmisartuussineri timmisartut malinnaaffiunerpaat pingasut tamarmik Air Greenlandimit timmisartuussinerupput.
Greenland Airportsip mittarfimmit toqqaannartumik YouTubekkut aallakaatittagaa inunnit 400-nit amerlanerusut aamma malinnaavigisimavaat.
Tuukkarlu nalunaaquttap-akunneri arfinillit timmisartuussereerluni kiisami mittarfimmut mimmat nuannaarlutik isiginnaarsinnaasimavaat.
