Tuukkaq putsernera pissutigalugu utertoq

Nuuk marlunngornermi putserlunilu pukkitsunik nuiaqarpoq, tamannalu Tuukkap Københavnimiit Atlantikoq qulaallugu timmisartuussineranut sunniuteqarpoq. Air Greenland taama uppernarsaavoq.

Timmisartoq Kulusuup kujataata kangianiittoq timmisartortartut Nuummi minnissartik taamaatillugu Københavnimut uterput. Taamaalilluni Tuukkap Nuummiit timmisartuussinissai aamma taamaatiinnarneqarput.

Jettime Nuummiit Kangerlussuarmiillu Københavnimut timmisartuussinermini Islandimi unippoq maannalu Danmarkimut ingerlaqqilluni.

Air Greenland-ip U-vendinger pillugit: Naamik, aarlerisaarutiginngilagut

Air Greenland Atlantiku qulaallugu timmisartuussinermi mittarfiup pingaarnerup Nuummut nuunneqarneraniilli arlaleriarluni utiinnartarsimavoq. Tamanna kingullermik marsip 13-ianni pivoq.

– Misiliineq ajorpugut. Sulinitsinni pissutsit qanoq innerat malillugu aalajangiisarpugut. Issttumi sila allanngupallassinnaammat allatut pisoqariataarsinnaasarpoq, taamaattoqartillugulu isumannaallisaaneq eqqarsaatigalugu allatut aalajangiisariaqartarpugut, piujuartitsinermut attaveqatigiinnermullu pisortaq Inga Dóra Markussen taamani nassuiaavoq.

Nuummiit timmisartuussinissat allat amerlanerit marlunngornermi ingerlanneqassasut naatsorsuutigineqarpoq, kinguaattoortoqarsinnaavorli.

Ullumikkut ilaasut eqqugaasut kingusinnerpaamik nalunaaqutaq 16.00 angalanissamut pilersaarutinik nutaanik nassinneqarumaarput, Air Greenland allappoq.