Ukiaanerani ataatsimiinneq marlunngorlugu avitaq

Inatsisartunut qinersinissamut ullunik kisitsineq aallartereerpoq. Aamma Naalakkersuisut siulittaasuat suli qinersinissamut ulluliinngikkaluartoq.

Taamaattorli qinersisoqarnissaanut kingusinnerpaamik 6. april 2025 ingerlanneqartussamut killittoqartinnagu , Inatsisartut qinigaaffimmi matumani naggammik ukiaanerani ataatsimiissapput.

Inatsisartut siulittaasoqarfiat ullormut oqaluuserisassanik saqqummiussisimalereerpoq, taakkulu qimerloorneqarsinnaapput Inatsisartut nittartagaanni.

Inatsisartut ukiakkut ataatsimiinnerat tallimanngornermi ulloq 20. september 2024, nal. 11.00 aallartissaaq, pilersaarutigineqarporlu ulloq 27. november 2024-p tungaanut ingerlanneqarnissaa, tamatuma kingorna UKA24-mi imm.1 unikkallassaaq. Tamatumalu kingorna UKA24 immikkoortoq 2 ulloq 27. januar 2025 aallartissalluni, tamatumani ataatsimiititaliat sapaatip akunnerani ataatsimi ataatsimiiffeqassallutik inersuarmilu ataatsimiinneq siulleq ulloq 4. februar 2025-mi ingerlanneqassalluni, taamak ilisimatitsivoq Inatsisartut siulittaasuat Mimi Karlsen (IA) tusagassiuutitigut nalunaarummini.

Ataatsimiititalianut ataatsimiinerit annertunerusumik inissaqartitsineq

Inatsisartut ataatsimiinnerini nalinginnaasuni ataatsimiititaliat ataatsimiittarnerini oqaluuserisat ataatsimiititalianut ingerlateqqinneqartartut amerlasuut suliarisariaqartarpaat, ataatsimiititaliallu ataatsimiinnerini piffissarujussuaq atorlugu suliaqartariaqartarput.

Tamanna pissutigisimagunarlugu Inatsisartut siulittaasoqarfiat aalajangersimavoq ataatsimiinneq februaari 2025 ilanngullugu ukiaanerani ataatsimiinneq ingerlanneqassasoq, ullormut oqaluuserisassat siammarneqarnerisigut ataatsimiititaliani ataatsimiiffissat inissaqartinneqarluassapput.

- Ilaatigut inersuarmi sapaatip akunnerinik ataatsimiiffeqarluni ilaatigullu ataatsimiititaliat sapaatip akunnerinik ataatsimiiffissalerlugit Inatsisartut ataatsimiinnerat aaqqissuunneqarpoq, Inatsisartut siulittaasuat nalunaarummini erseqqissaateqarpoq.

Apeqquteqaatilli aallaavigalugit oqallisissianik tunniussivissap 6. september 2024-p kingorna ullut ataatsimiiffissat siulittaasoqarfimmit naleqqussarneqartussaassapput, taamaattumillu tamatuma kingorna ullut ataatsimiiffiit ilaanni oqaluuserisassanik naleqqussaasoqartariaqartassaaq.

Taamaalilluni Inatsisartunut ilaasortanit immikkoortut nutaat katillugit 51-it aammalu Naalakkersuisunit immikkoortut nutaat 29-t UKA24-mi oqaluuserisassatut ilanngunneqarput.