KL

DK

Ukioq manna aningaasanut inatsisissami sinneqartoorutit ikiliartorput amigartooriartulerlutillu

Ukiumut aningaasanut inatsit unammillerneqarpoq. Angusat IST-mi 291,4 millionit koruuniunissaata missingersorneqarneranut taarsiullugu naliliinerit kingulliit naapertorlugit 248,9 millionit koruuninik amigartooruteqarnissaq naatsorsuutigineqarpoq.

NunaGreen A/S-imut 400 millionit koruuninik aningaasaliissuteqarneq Namminersorlutik Oqartussat septembarimut missingersuutaannut sunniuteqarpoq
Tusagassiortoq
Saqqummersinneqarpoq

NunaGreen A/S-imut 400 millionit koruuninik ilassutitut aningaasaliissuteqarneq septembarimi missingersuutinut Aningaasaqarnermut Akileraartarnermullu Naalakkersuisoqarfiup missingersuutaanut sunniuteqangaatsiarpoq. Royal Greenland A/S-ip aningaasatigut ajornartorsiortup iluanaarutinik akiliinnginnera missingersuutinut aamma sunniuteqarpoq.

- 2024-mut Aningaasanut Inatsimmi angusat IST-mi 291,4 mio. kr. sinneqartoorutaasuutut missingersorneqarsimapput. Matuma saniatigut ilassutitut aningaasaliissutinik tunniussisoqarsimavoq, ataatsimut isigalugu 415,2 mio. kr.-inik ajornerulersitsisumik, Aningaasaqarnermut Naalakkersuisoqarfik ilisimatitsivoq nangillunilu:

- 2024-mi 125,1 mio. kr.-inik ajornerulersitsisussamik nikingasoqarnissaa naatsorsuutigineqarpoq. 248,9 mio. kr.-inik amigartoorfiunissaat naatsorsuutigineqarpoq.

Malunnaatilimmik nikingassuteqarsinnaanerat aalerinaateqartoq

Aningaasaqarnermut Naalakkersuisoqarfik erseqqissaavoq akileraartarnermut tunngassuteqartut “malunnaatilimmik nikingassuteqarsinnaanerat aarlerinaateqartartoq, tassa tunngavissarititaasut allanngornerinut suliassaqarfimmut tassunga missingiusiat sunnertiasuummata aamma isertitat aningaasartuutillu tamarmiusut kingusissukkut aatsaat paasineqarlualertarmata”.

Namminersorlutik Oqartussat ataani naalakkersuisoqarfiit tamarmik aningaasanut inatsimmi politikkikkut sinaakkutissatut allassimasut malinneqarnissaat qulakkeerniarlugu aningaasanut inatsimmi naatsorsuutinut ilanngussaqarput.

Pingasut maluginiarnartut

Naalakkersuisoqarfiit pingasut maluginiarnartumik aningaasanik amigartooruteqangaarsimapput: Naalakkersuisut Siulittaasuata Naalakkersuisoqarfia, Peqqissutsimut Naalakkersuisoqarfik aamma Aningaasaqarnermut Akileraartarnermullu Naalakkersuisoqarfik.

Naalakkersuisut Siulittaasuata Naalakkersuisoqarfiata missingersuummi 89,8 millionit koruuninik amigartooruteqarnissaq naatsorsuutigaa, tamannalu pingaartumik Namminersorlutik Oqartussat piginneqatigiiffiutaannit iluanaarutinit isertitat ikileriarnerannik 82,8 millionit koruuninik aamma Digitalinngortitsinermut Aqutsisoqarfimmit 7 millionit koruuninik aningaasartuuteqarnerulernermik pissuteqarpoq.

Peqqissutsimut Naalakkersuisoqarfiup missingersuutit 45,6 mio. kr.-nik amigartooruteqarnissaat naatsorsuutigaa, tassani pingaartumik peqqinnissaqarfimmi immikkoortortaqarfinnut aningaasartuutit ilaneqarnerat missingersuutinut 48,3 mio. kr.-nik artukkiipput. Suliassaqarfimmi allarpassuarni aamma naatsorsuutigineqartumit amerlanerusunik atuisoqarsimavoq, aningaasartuuteqarnerullu tamarmiusup ilaannaa aningaasartuutinit ikinnerusunit matussuserneqarsimavoq, soorlu kigutit nakorsaannit kiffartuunneqarnermi (12,7 mio. kr.), tarnimikkut napparsimasut nunani allani katsorsartinnerinut (11,2 mio. kr.), nuna tamakkerlugu peqqinnissakkut ilinniartitaanikkullu suliniutit (7,8 mio. kr.) aamma napparsimasunut taarsiissutissat (4,7 mio. kr.).

Aningaasaqarnermut Naalakkersuisoqarfiup naatsorsueqqissaartarfiata 34,4 millionit koruuninik amigartooruteqartoqarnera saqqummiuppaa, tassanilu nassuiarneqarpoq tamanna EU-mik suleqateqarnermut isumaqatigiissummit 33,3 millionit koruuninik isertitakinnerusimanermik pissuteqartoq, tamannalu aningaasat tunniunneqartarnerisa piffissap ilaani kinguaattoortarnerannik pissuteqarpoq. Aammattaaq naqissusiinermut akitsuutitigut 7 millionit koruuninik aningaasartuuteqarnerusoqarsimavoq.

Atuinikinneruffiit

Naalakkersuisoqarfiit allat marluk millioninik marlunnik kisitsisitalinnik atuinikinnerupput.

Ineqarnermut Attaveqaasersuutinullu Naalakkersuisoqarfik inissianut aningaasalersuisarnermi 15 millionit koruuninik isertitaqarniarluni naatsorsuuteqarsimavoq, Isumaginninnermullu Naalakkersuisoqarfik 30,3 millionit koruuninik atuinikinnerunissamik naatsorsuuteqarsimavoq, tamatumanilu pingaarnertut ineqarnermut tapiissutinut 24,9 millionit koruuninik aningaasartuutikinnerusimaneq pissutaanerpaavoq.

Akiliisinnaassuseqarneq

Qaammatit aqqaneq-marluk kingulliit Namminersorlutik Oqartussat akiliisinnaassusaat 675 millionit koruunit aamma 1.208 millionit koruunit akornanniipput, tamannalu qaammatinut aqqaneq-marlunnut siuliinut sanilliullugu 74 millionit koruunit aamma 81 millionit koruunit akornanni ajorseriarneruvoq.

nunagreen a/s inuiaqatigiit finansdepartementet budgetoversigt selvstyret samfund royal greenland a/s

ATORFIIT Se alle jobs

Powered by Labrador CMS