KL

DK

Ukioq nutaamiit anguniakkat: Pujortarunnaarneq, peqqinneruneq apersortitsinerlu

Ukiup naalernerani ukioq nutaamiit suut anguniassanerlugit inuit ilaasa eqqarsaatigisarpaat. Sisimiuni innuttaasut aappaagumit suut anguniarneraa Sermitsiamit apersorneqarput, kiisalu ukioq manna nutaarsiassat suut eqqaamaneruneraat.

Peqqinnartumik inoorusukkaluarpunga, kisianni kinguartittuaannaavillugu. Ilinniarnera, siniga nerisakkalu pitsanngoriassagaluarput. Ilinniarninnut angusarissaarusukkama, anguniakkani aalluppaloqalugu Alice Andreassen oqaluttuarpoq.
Tôrtia Reimer-Johansen
Journalist
Offentliggjort

Ukioq nutaaq inuppassuarnut nutaamik aallartiffiusarpoq.

Inuit ilai nutaanik anguniagaqarusuttarput.

Taakkunani ilaavoq Bolethe Jonathansen:

- Pujortarunnaarusoqaanga timersornerulerlungalu. Piviusunngortinniartariaqassavara, ilassarsiorpunga peqatiginnikkusuttunik. Peqqinnerulerusoqaanga.

GUX-imi Sisimiuni ilinniarnertuunngorniartoq, Alice Andreassen anguniagassaminut alloriareerpoq.

- Pujortarunnaareerama imertarunnaarlungalu. Aappaagumiit peqqinnarnerusunik nerinissara anguniassavara. Peqqinnartumik inoorusukkaluarpunga, kisianni kinguartittuaannaavillugu. Ilinniarnera, siniga nerisakkalu pitsanngoriassagaluarput. Ilinniarninnut angusarissaarusukkama, anguniakkani aalluppaloqalugu Alice Andreassen oqaluttuarpoq.

Alice Andreassen aappaagu akademiuddannelsemut ilinnialeqqikkusuppoq.

Apersortitsinissaq anguniagassaassaaq

Amalie G. Poulsen ukioq manna allanik anguniagaqarpoq:

- Immaqa innga arpaqatigisalissavara, arnaq arpalluni saneqquttoq tikkuaatigalugu oqarpoq. Illariariarluni oqaqqippoq:

- Naamik, haha. Aappaagu peqqinnerunissaq takorluunngilara.

Akullequnni apersortittussaammat apersortitsinissaq anguniassavaa.

- Annerusumik aappaagumut apersortittoorluarnissaq anguniassavara. Apersortittoorniarluni pisariusinnaasarami. Kalaallisuussai isumagissavagut qaaqqusiffissarlu isumagisussaassallugu, oqaluttuarpoq.

Ukioq manna nutaarsiassat

Sisimiormiut pingasut nutaarsiassanik malinnaasimapput, pingaarnertut Paul Watsonip tigummigallagaanera malinnaaffigisimavaat.

- Isumaqarpunga eqqarsarnartoq Paul Watson nunatsinni tigummigallagaammat, kisianni maanna iperagaareerpoq, ajunnginnerpaamik kissaatiinnarsinnaavarput, Bolethe Jonathansen oqarpoq.

Amalie G. Poulsenip aamma malinnaaffigisimavaa.

- Apeqqusersimavara sooq nunatsinni tigummigallagaassanersoq. Inatsit atuuttut eqqarsaatigalugu allaaneruallaarsimanavianngilaq. Kisianni qujanaqaaq iperagaasoq.

Alice Andreassenip nutaarsiassanik malinaanera illoqarfimmuuneruvoq kiisalu nuummi mittarfissuup ammarnera malinnaaffigilluarsimavaa. Kiisalu illoqarfimmi Sisimiuni persuttaattaqattaarnerit initusimapput.

- Mittarfissuaq malinnaaffigaara, taavalu maani illoqarfimmi persuttaasaqattaarnerit. Neriuppunga aappaagut illoqarfimmi toqqissisimanerujumaartugut. Suna tamarmi ajortuinnaannginnami, aamma ajunngitsortaqarami.

kultur inuiaqatigiit

ATORFIIT Se alle jobs

Powered by Labrador CMS