Ukiumoortumik nalliuttorsiornermi ph.d.-tut allagartat aatsaat taama amerlatigisut tunniunneqartut

Ilisimatusarfik pisarnertut tallimanngormat ukiumoortumik nalliuttorsiorpoq, tassani ph.d.-tut allagartat arlalinnut tunniunneqarlutillu ukiumut nersornaasiisoqarpoq.

Ukioq manna nersornaat Aviaja Lyberth Hauptmannimut tunniunneqarpoq. Taanna Ilisimatusarfiup uumassusilerinermi bacheloritut ilinniarfittaavanik, SILA-mik, ineriartortitsinermik aallarnisaanermillu suliaqarnernera pissutigalugu nersornaaserneqarpoq, Ilisimatusarfik nittartakkamini allappoq:

- Aviaja ilinniakkamik nutaaliortumik pilersitsisimavoq, ilinniakkami ilinniartitsineq aaqqissugaaneralu nunatsinni pinngortitaq piorsarsimassuserlu nutaaliortumik pissanganartumillu ilanngunneqarput, Ilisimatusarfik Aviaja Lyberth Hauptmannimut nersornaammik tunniussinermut tunngavilersuutigalugu allappoq.

Bent Pedersen Naatsorsuuserinermut Immikkoortortaqarfimmi immikkuullarilluinnartumik sulineranut, attassineranut suliamullu piginnaassuseqangaatsiarneranut kiisalu studieadjunktit kalaallisut oqaasillit Ukiumut aamma nersornaaserneqarpoq.

Ph.d.-tut allagartat arfineq-marluk tunniunneqarput

Nalliuttorsiornermi ph.d.-tut allargartat aatsaat taama amerlatigisut tunniunneqarput. Ph.d.-nngortullu ukuupput:

• Signe Ravn-Højgaardip ph.d.-nngussutaa: "Inuiaqatigiinni mikisuni tamanut ammasuuneq – Kalaallit Nunaanni tusagassiuutit pillugit misissuineq".

• Hjalte Larsenip ph.d.-nngussutaa: "Kalaallit Nunaanni uummatip taqaatigut nappaatit uummallunnerlu: Kalaallit akornanni uummatikkut milikartoornerunngitsumik ineerartaanik allisoortarnermut misissuineq".

• Julie Flyger Holflodip ph.d.-nngussutaa: "Kalaallit Nunaanni imigassamik ikiaroornartunik allanillu aanngajaarniutinik pinngitsuuisinnaajunnaarnermik katsorsaariaatsit pitsaanerpaat atorneqarnerannik nalilersuineq".

• Nadja Albertsenip ph.d.-nngussutaa: "Kalaallit Nunaanni uummatip killernerta akulikippallaarnera”

• Ivalu Katajavaara Seidlerip ph.d.-nngussutaa: "Kalaallit Nunaanni imminut toqunnissamut aarlerinaateqarnermut pissuserineqartartut, pisartut aqqusaarneqartartullu – nalunaarsukkat, misissuinerit apersuinerillu aallaavigalugit aaqqissuussamik misissugaq".

• Mette Mørup Schlütterip ph.d.-nngussutaa: "Utoqqalinermi nalorninartumik inuuneq — Kalaallit Nunaanni utoqqalinermi peqqissutsimut, ataqatigiinnermut neriuutinullu tunngatillugu nalorninermik misissuineq"

• Nick Duelundip ph.d.-nngussutaa: "Meeqqat isigisinnaassusaannik misissuineq — qanoq ittuuneranik, misissuisarnerit siunissamilu siunnerfimmik nalilersuineq”.

Ilinniartut siulliit eqqaamasalersaarutigineqartut

Ilisimatusarfimmi ilinniartut siulliit ukiut 40-t matuma siorna aallartipput, tamannalu atuakkanik atorniartarfiup pisortaata Bolethe Olsenip eqqaamasalersaarutigaa. Taannalu nalliuttorsiornermi oqalugiartuuvoq.

1984-imi ilinnialertuni siullerni ilaavoq:

- Nunatta Atuagaateqarfiata ilassutaani inimi qullermi aallartippugut. Taamani inuususseruttorluta periarfissatsialak nuannaarluta atorluarlugu ilinnialerpugut, naak inissakillioraluarluta ilinniartut sulisullu aporfissalersorata ilinniarpugut, ilinniartut sulisullu 15-it sinnilaarlugit amerlassuseqarluta.

- Igaffeerannguaq tattoqillioraluarluta sutortarfigaarput, tamannali immitsinnut qanillisaatigiinnarunarparput. Ilinniartut arfiniliulluta Naalakkap Qaqqaani illu sungaartoq affarleriiusoq najugaqarfigaarput, perusuersartarfik imaartagaavoq, eqqaamiutsinnullu ilinniartut najugaqarfiannut uffariartarpugut, tamaasali naammagalugit atorpagut ilinniagarlu pissanganaqisoq aallulluaannarlutigu.

Oqalugiaataa tamarmi, Ilisimatusarfimmi pisimasunik arlalinnik eqqaasaqarfiusoq, Ilisimatusarfiup nittartagaani atuarneqarsinnaavoq.