Ukiuni 130-nngortorsiornermut atatillugu inoroorsaarneq pillugu eqqumiitsuliamik tunissuteqartoqartoq
Tasiilaq aggustip naanerani ukiuni 130-nngortorsiorluni nalliuttorsiorpoq, tamannalu eqqumiitsuliamik inoroorsaarnermut assersuutaasumik nalliussineqarpoq.
Inuusuttut qalipagaq maanna illoqarfimmut tikilluaqqussut suliarivaat.
Assiliisoq: Kommuneqarfik Sermersooq
Tasiilap aasaq manna 130-nngortorsiornera malunnartinniarlugu, inuusuttut eqqumiitsuliamik umiarsualivimmi Pilersuisup illutaata eqqaani qalipaapput.
Eqqumiitsuliaq Ammassalimmi Katersugaasiviup eqqumiitsuliortoq Sacha “Cheeky” Malinský suleqatigalugu illoqarfimmiunut tunissutigaat.
Kommuneqarfik Sermersooq nittartakkamini taama allappoq.
Eqqumiitsuliami ersersinneqarpoq ammassak tunumiutullu allanneqarluni “Digidduari,” isumaqartoq “Tikilluarit”.
- Eqqumiitsuliortup illoqarfiup taaguutigeqqaagaa Angmagssalik aallaavigalugu isumassarsiorsimavoq, eqqumiitsuliamilu inoroorsaarneq, Tasiilarmiut ilisarisimaneqaataat ersersinniarneqarluni. Sumiiffimmi naasut assingi tungujuaartunngorlugit eqqumiitsuliamut sinaakkusiunneqarsimapput, tassuuna illoqarfiup innuttai tikeraallu tikilluaqqullugit, suliaq pillugu kommune allappoq.
- Illoqarfiup oqaluttuarisaanera peqatigitillugulu Tasiilami ammasuunermik kissalaassusermillu misigititsisarnermik ilisimaneqarnera eqqumiitsuliakkut ersersinneqarnissaa angorusunnikuuara, eqqumiitsuliortoq Sacha “Cheeky” Malinský oqarpoq.
Inuusuttut qalipaaqatigalugit misigisaq asseqanngitsoq eqqumiitsuliortup aamma oqaatigaa.
-Tasiilap 130-nngortorsiornerani inuusuttut illoqarfimminnut tunissutaat kusanaqaaq, oqarpoq.
Aningaasaateqarfik Sermeq kiisalu Tasiilami Najukkami Ataatsimiititaliaq, STARK, RAL aamma Pilersuisoq suliniummut aningaasaliisuupput.
