Ukiuni qulini isumaqatigiissut milliardilikkaat kinguaattoorutaanerannut iluaqutaassaaq
Naalakkersuisut partiillu naalakkersuisoqatigiit IA aamma Siumut ineqarnermut tunngasut aaqqiivigineqarnissaat pillugu politikkikkut isumaqatigiissuteqarput, inissiammi namminersorlutik oqartussanit pigineqartut aserfallatsaaliorneqarnissaat milliardilikkaanik kinguaattoorutaapput.
- Ineqarneq pillugu aaqqissuusseqqinnissaq
pillugu isumaqatigiissuteqarnitsigut, ineqarnermut suliassaqarfimmi unammillernartut
ataatsimoorluta qanoq aaqqiiviginiassanerlutigit isumaqatigiippugut, siunissamilu
suleqatigiinnissaq aalaakkaasumik sinaakkuserneqarluni, Ineqarneq pillugu aaqqissuusseqqinnissaq pillugu politikkikkut
isumaqatigiissutip saqqummiunneranut atatillugu Hans Peter Poulsen oqarpoq.
Leiff Josefsen
Naluneqanngilaq Namminersorlutik Oqartussat inissiaataasa aserfallatsaaliorneqarnissaat 2 milliardit koruunit sinnerlugit kinguaattoorfiusoq, ajornartorsiullu politikkikkut aaqqinneqanngippat kinguaattoornerit suli amerliartuinnassapput.
Tamanna politikkikkut aaqqiagiinngissutaangaarsinnaavoq, ineqarnermut akiliutit qaffannissaat aaqqiissutissatut ilanngunnissaat avaqqunneqarsinnaanngitsoq maannamut misissuinerit takutimmassuk, tamannalu qinersisartorpassuarnit iluarineqarpianngilaq.
Inissiat aserfallatsaaliorneqarnissaat kommunit arlallit anguniarlugu ineqarnermut akiliutit qaffanniarlugit iliuuseqarsimapput, tamannali Naalakkersuisut iluatsissinnaasimanngilaat.
Ineqarnermut akiliutit naleqqussarneqassapput
Piffissami sivisuumi ineqarnermut aaqqissuusseqqinnissaq Naalakkersuisut sulissutigisimavaat, tallimanngormallu suliamut atatillugu nutaarsiassaqarpoq. Partiit naalakkersuisooqatigiit marluk IA aamma Siumut ukiuni qulini atuuttussamik isumaqatigiissuteqarsimasut, Naalakkersuisut ilisimatitsipput. Suliniutinut assigiinngitsunut aningaasanik immikkoortitsisoqanngilaq, isumaqatigiissulli partiit malitassaattut pisussaaffigaat:
- Siunissami sulinissamut politikkikkut sammivissaq isumaqatigiissummi nassuiarneqarpoq, unammillernartussallu aammalu suliassat tulleriiaarneqarnissaat aalajangersarneqarlutik. Ineqarnermut suliassaqarfiup aaqqissuuteqqinneqarnerani immikkoortut imarisai ataavartumik isumaqatiginninniutigineqartassapput. Suleqatigiinnermi kommunit akuutinneqassapput, isumaqatigiissummi allassimavoq.
Isumaqatigiissutip immikkoortui arlallit partiit taakkua marluk piffissami tassani isumaqatigiinniutigisassaraat, ilaatigut Namminersorlutik Oqartussat inissiaataasa attartortittakkat aningaasatigut oqimaaqatigiissaarneqarnissaat, tamannalu ineqarnermut akiliutit qaffannerannik kinguneqassaaq.
Inissianik attartornermut inatsit nutaaq atorlugu allannguineq piffissap ingerlanerani pissaaq, taamaalilluni innuttaasut aningaasaqarnikkut naleqqussarnissaminnut periarfissaqalissallutik.
Ineqarnermut tapiissummik pissarsisinnaaneq aamma annertusarneqassaaq, pissakinnerit ikiorserneqarsinnaaniassammata.
Namminersorlutik Oqartussat inissiaataasa iluarsaanneqarnissaannut aningaasalersuinissamut pilersaarut ukioq manna saqqummiunneqassaaq.
Namminersorlutik Oqartussat inissiaataat ikilisarneqassapput
Pilersaarut naapertorlugu sulisunut inissianik atuisarnerup annikillisinnissaa partiit aamma sulissutigissavaat, Namminersorlutilli Oqartussat suliffeqarfiutaannut allamut nuukkaanni sulisut inissiaataanni najugaqartuarnissaq ajornarunnaassaaq.
Namminersorlutik Oqartussat inissiaataat ikilisarniarlugit innuttaasullu namminneerlutik inissiaqarnerulerniassammata, piginneqatigiilluni inissiat pillugit inatsit naleqqussarneqassaaq, taamaalilluni Namminersorlutik Oqartussat inissiaataasa attartortittakkat piginneqatigiilluni inissianngortinneqarnissaannut inatsimmi tunngavissamik qulakkeerisoqassalluni.
Pilersaarut ukuninnga qulequtaqarpoq:
Najugaqatigiiffiit aningaasaqarneranni oqimaaqatigiissitsineq - Namminersorlutik Oqartussat inissiaataanni ineqarnermut akiliutip ingerlatsinermut aserfallatsaaliuinermullu pissusiviusuni aningaasartuutinut naapertuunnissaata qulakkeerneqarnissaa.
Ineqarnermut tapiissut pillugu aaqqissuusseqqinneq nutaaq - Ineqarnermut akiliutip naleqqussarneqarneranik piviusunngortitsinermut atatillugu innuttaasunut aningaasaatikitsunut aningaasaqarneq pillugu toqqissisimatitsinissaq.
Namminersorlutik Oqartussat inissiaataannik iluarsaassinissamik suliniuteqarnissaq - inissianik aserfallatsaaliuisimannginnerup annertusiartornissaata unitsinneqarnissaa -iluarsaassinermut suliniutissanik aningaasalersuinissamut, ineqarnermut akiliutip ingerlatsinermut aserfallatsaaliuinermullu pissusiviusuni aningaasartuutaasartunut naapertuunnissaa pisariaqarpoq.
Illuliortiternernut aningaasalersueriaatsinik naleqqussaaneq - innuttaasut aaqqissuussinernut periarfissaqarnerat pitsanngorsarneqassaaq, taamaalillutik innuttaasut ineqarnikkut imminut pilersornissamut periarfissaqarnerat qulakkeerneqassalluni. Attartortuunermit piginnittuunermut periarfissat pitsanngorsarneqarnissaannut periarfissat immikkut ittumik ukkatarineqassasut kissaatigineqarpoq.
Sulisunut inissianut tunngaviusut - sulisunut inissianik atuisarneq annikillisinneqassaaq. Sulisunut inissianik atuinermut tunngavinnik kiisalu killissanik inatsisissatut siunnersuummik suliaqartoqassaaq.
Namminersorlutik Oqartussat inissiaataannik ikilisitsinissaq - Namminersorlutik Oqartussat inissianik sapinngisamik ikinnerpaanik piginnittuussapput aammalu innuttaasut imminnut inissiamik pilersornissaannut annertunerusumik tunngavissiisoqartalissaaq.
