Ukiut pingasut qaangiuttullu oqaluttuarisaanermi pisimasut qulaajarneqarnerat aallartippoq
Oqaluttuarisaanermi pisimasunik qulaajaanissamut piareersarneq sivisusimavoq, maannali ilisimatusartut Danmarkip Kalaallit Nunaatalu 1945-miilli attaveqatigiinnerat qulalaajarlugu aallartissinnaanngorput.
Kalaallit Nunaata Danmarkillu akornanni pissutsit oqaluttuarisaanermut pingaarutillit qulaajarneqarnissaat pillugu isumaqatigiissut Múte B. Egedep Mette Frederiksenillu juunimi 2022-mi atsiorpaat.
Assi: Namminersorlutik Oqartussat
Kalaallit Nunaata Danmarkillu akornanni sorsunnersuup aappaata kingornaniit maannamut qanoq pisoqarnikuua?
Qulaajaanermi annertuumi oqaluttuarisaanermullu pingaarutilimmi apeqqut misissuiffigineqassaaq, taannalu ukiuni pingasuni utaqqineqareerluni ataasinngornermi aallartinneqarpoq.
Ilisimatusarfik tusagassiuutinut nalunaarummi allappoq.
Arlaannaannulluunniit attuumassuteqanngitsut ilisimatusaatigalugu qulaajaanissaat aallartinneqassasoq Naalakkersuisut danskillu naalakkersuisui 2022-mi juunip 9-anni ataatsimut nalunaaruteqarput.
Qulaajaanermi siunertarineqartoq tassaavoq aalajangiinerit, iliuutsit allanngoriartortitsinerillu ukiuni qulikkuutaani kingullerni Kalaallit Nunaata ineriartorneranik aamma nunatta Danmarkillu akornanni pissutsinik ilusilersuisimasut paasinissaannut suliatigut patajaatsumik tunngaveqartoqarnissaa. Tamanna ilutigalugu pisimasut pillugit ataatsimut paasinnilluartoqarnissaa aamma saammaasseqatigiinnissamut tunngavissiisoqarnissaa aammattaaq anguniarneqarput.
- Piffissaq Kalaallit Nunaannut Danmarkimullu isumaqarsimaqisoq pillugu ilisimasanik nutaanik pilersitsinissaq pingaaruteqarlunilu tamatumunnga akisussaaffik annertuvoq. Maniguulluta suliatigullu peqqissaarussilluta suliassaq aallutissavarput - neriuutigaarpullu paaseqatigiinnissamut aamma assigiinngisitaarnerusumik oqaluttuarisaanermik pilersitsisoqarnissaanut sulinerput tapersiiumaartoq, ilisimatusartoqatigiit aqutsisui Tenna Jensen aamma Daniel Thorleifsen oqarput.
Ukiut pingasut aallartinniaasaartoq
Qulaajaasoqarnissaanut nalunaarutiginninnermiit suliap aallartinnissaanut ukiut pingasut ingerlapput.
Nunatta Katersugaasiviani pisortaq Daniel Thorleifsen 2023-mi suliniummi ilisimatusarnermik aqutsisussatut toqqarneqaramili suliap aallartinnissaanut piareersimalluni DR-imut maajimi oqarpoq.
- Naluara sooq taama sivisutiginersoq, Daniel Thorleifsen DR.dk-mut taamani oqarpoq.
Ilisimatusarfik tusagassiorfinnut nalunaarummi oqaluttuarpoq,
ilisimatusarnermik suliaq sivisuumik aallartisarneqarsimasoq
pilersaarusiorneqarlunilu piareersarneqarsimasoq, tamatumalu kingunerisaanik
ilisimatusarnermik suliaq maanna aatsaat aallartinneqarsinnaasoq.
Ilisimatusaatigalugu suliap sivisuumik pilersaarusiorneqarlunilu piareersarneqartariaqarnera aatsaat maanna aallartinneqarneranik kinguneqartoq, Ilisimatusarfik tusagassiuutinut nalunaarummi allappoq.
Qulaajaaneq ukiuni arlalinni ingerlassaaq. Kalaallit Nunaanni Danmarkimilu ilisimatusartut, immikkut ilisimasallit oqaluttuarisaanermillu ilisimasallit suleqataassapput.
Ilisimatusarnermi aqutsisup aappaa, Ilisimatusarfimmi centerimi pisortaq, Tenna Jensen, spiralilersuisimanerup qulaajarneqarneranut ataasinngormat naammassisussaagaluartumi, sulili tamanut saqqummiunneqarsimanngitsumi, aamma aqutsisuuvoq.
Ilisimatusarnermi aqutsisut Naalakkersuisut danskillu naalakkersuisuinit toqqarneqarput, aaqqissuussaanikkullu Ilisimatusarfimmut atasuullutik.
