NUNANIT ALLANIT
Ukraine nalunaarpoq russit qaartartunik ungasianiit igeriuttakkanik atuilersimasut
Ukraine nunallu killiit mumingariinnik nalunaaruteqarput, ilumut Ruslandip qaartartumik ungasianiit igeriuttakkamik atuilluni Dnipromik saassussisimanersoq.
Qatserisartut saliipput, russit missilimik igeriussillutik sisamanngornermi Dnipro-mut saassussinerisa kingorna. Ruslandip Ukrainellu akornanni sorsunneq sapaatip akunnerani matumani sakkortusivoq, qaartartut piginnaasaqarnerusut atorneqalernerisa kingunerisaanik.
Assiliisoq: State Emergency Service Of Ukrai/Reuters
Ukrainemi illoqarfik Dnipro sisamanngornermi ullaap tungaa qaartartoq missili atorlugu saassunneqarpoq , Ukrainemi silaannakkut illersornissaqarfik naapertorlugu qaartartoq ungasianiit igeriuttagaq ballistisikiusoq atorneqarsimaneragaavoq.
Paasissutissaq Ruslandimit uppernarsarneqanngilaq. Kisianni tamanna eqqorsimappat, ilisimatuut naapertorlugit siullerpaamik Ruslandip qaartartumik missilimik Ukrainemut sorsunnermini aatsaavissuaq atuilluni saassussisimassaaq.
Kisianni sisamanngornermi kingusinnerusukkut nunat killiit allaanerusumik nalunaaruteqarput.
Taakkua naapertorlugit Rusland ballistiskimik missilimik atuisimanngilaq sisamanngornermi Dnipro-mut saassussinermini.
Taamaalillutik nunat killiit Ukrainemi pisortat nalunaarutaat akerlilerpaat.
Naliliineq siulleq naapertorlugu misissuinermi inerniliussaq tunngavigineqarpoq, inerniliineq allanngorsinnaavoq, tusarfiit marluk, Reutersimut nalunaaruteqartut aterminnillu saqqummiussiumanngitsut erseqqissaapput.
Amerikami tv-qarfik CBS Newsip tusarfiit taakku nunat killerneersut issuarneqarput, taakku oqarmata, qaartartut ungasianiit igeriuttakkat missililit ballistiskiusut pineqanngitsut.
Ruslandi præsidentia, Vladimir Putin, nunamini innuttaminut oqalugiaammini sisamanngornermi unnukkut oqarpoq, akunnattumik ungasissusilinnut qaartartoq sakkussiaq nutaaq ruslandip sakkutuuisa atorsimagaat.
Missili misilinneqarpoq "nunat killiit saassussinerannut akissutitut", taanna oqarpoq.
Putinip ilanngullugu oqaatigaa, aaqqiagiinnginneq sakkortusissappat, Rusland "assinganik" akissasoq.
Ukrainemi sisamanngornermi siusinnerusukkut kimmut nunanut ikinngutiminut kaammattuivoq "Ruslandi sakkussamik nutaamik atornera" piaartumik akissuteqarfigeqqullugu.
- Ullumi missili nutaaq russit atorpaat. Ilisarnaatit tamarmik - sukkassuseq, portussuseq - tassaapput ungasissusumut ballistiskimik missilip ilisarnaatai. Misissuineq immikkut ilisimasalinnit maanna ingerlanneqarpoq, Ukrainep præsidentia, Volodymyr Zelenskyj, nalunaarummi oqarpoq.
Ukrainemi illersornissaqarfik sisamanngornermi siusinnerusukkut nutaarsiassaqartitsivimmut AFP-mut nalunaarpoq, ersarilluinnartumik missili sanaajusoq nalinginnaasumik aammali atomip nukinga atorlugu qaartartumeerissutigineqarsinnaasoq.
Ukrainemi tusagassiorfimmit Ukrajinska Pravda naapertorlugu misilissat RS-26-itut ittut pineqarput, 5800 kilometerinik ungasissuseqarsinnaasut, Reuters allappoq.
Ukrainemi silaannakkut illesornissaqarfik naapertorlugu Astrakhan-imiit, Ruslandip kujataani Kaspiske Hav-imut killeqarfeqartumiit, aallartinneqarpoq.
AFP naapertorlugu inuit marluk saassussinermi ajoquserput, ilaatigut Dnipromi suliffeqarfik eqqorneqarmat.
Dmitrij Peskov, Kremlimi, Ruslandip aqutsisoqarfiani oqaaseqartartoq, interkontinentale missilit atorneqarsimanersut pillugit nalunaarutit oqaaseqarusunngilaq.
Kremlimi oqaaseqartartoq ilanngullugu oqarpoq, Ruslandip sapinngisani tamaat atorlugu atomip nukinga atorlugu qaartartumeerinerit pinngitsoortinniarsarigai.
Ulluni kingullerni Ruslandip, illuatungaanilu Ukrainep aamma USA-p akornanni saassussinerit annertusipput.
USA-p kingullermik akuersissutigaa, Amerikamiut sanaavinik ATACMS-inik qaartartunik ungasissumut igeriunneqarsinnaasunik Ruslandimi anguniagassanut Ukraine atuisinnaasoq.
Marlunngornermi Ruslandip atomip nukinga atorlugu periaatsini nutarterpaa.
Tamanna isumaqarpoq, Ruslandip atomip nukinga atorlugu akissuteqarsinnaanera nunamit atomip nukinga atorlugu sakkulersorsinnaasumit tapersersorneqartumik annertuumik nalinginnaasumik saassussisoqassappat.
Sorsuffiusumit Ruslandip sakkutooqarfia nalunaarpoq, russit sakkutuut sisamanngornermi nunaqarfimmut Dalnemut isersimasut, illoqarfissuup Donetsk-ip 50 kilometerinik kitaatungaani inissisimasumut.
