Ukrainemut ikiorsiissutinik pingaarutilinnik tunniussinissaq USA-mi Inatsisartut akuersissutigaat

USA-mi Inatsisartut amerlanerussuteqartut arfininngornermi unnukkut taasinermikkut aalajangerput Ukrainemut sakkutooqarnikkut tapersersuineq ikiorsiissutillu 426 milliarder koruunit nalinginut tapersiiniarlutik.

Ukrainemut ikiorsiissutit pillugit aalajangiineq partiit akimorlugit pivoq, tamanna sioqqullugu Republikanerit Partiiani immikkoortortaqarfik qaammatini arlalinni aalajangiisitsinaveeqqareersorlu, taamaalilluni USA-p Ukrainemut sakkussiatigut ikiorsiissuteqartarnera nanginneqarsinnaalerpoq.

Aalajangiineq maanna Senatimut ingerlateqqinneqarpoq, tassani ilaalluni Ukrainemut, Israelimut Taiwanimullu ikiorsiissutissat ataatsimut suliarineqassapput, aammalu TikTok-imut tunngatillugu apeqqut tassani ilaavoq: Inuit attaveqaqatigiittarfiat taanna Kina-mit pinngorfilik USA-mi inerteqqutaareerluni inerteqqutaatilivinneqassanersoq imaluunniit ammaateqqinneqassanersoq ukioq ilivitsup iluani isummertoqartussaalluni.

Senatip taasitinneqarnissaa marlunngorpat pissasoq naatsorsuutigineqarpoq. Tassani siornatigut Ukrainemut ikiorsiissutissanut amerlanerussuteqartunik tapersiisoqarpoq. Senatip qaammatini marlunni siornatigut Ukrainemut pilersaarut assingusoq tapersernikuummagu.

Senatip ikiorsiissutit pineqartut akuerissappagit naatsorsuutigineqartoq marlunngornermi piviusunngortinneqassasoq, ullup taassuma naajartornerani Præsident Joe Bidenip atsiorneratigut.

- Alloriarneq Europami aammalu Amerikap Avannaanilu tamatsinnut isumannaannerulersitsissaaq. NATO-p generalsekretæria, Jens Stoltenbergip, X-mi tusagassiorfimmi taasinerup kingorna allappoq.

Ukrainap præsidentia, Volodymyr Zelenskyj, Repræsentanternes Husimut tapersersuisimanermut qujassuteqarpoq, aammalu immikkut Republikanerit siulittaasuannut, Mike Johnsonimut.

- Tamanna sorsunnerup siaruaatinnginnissaanut iluaqutaassaaq, aammalu tuusintilikkaanik inuunernik annaassiniarnerussaaq, taanna X-mi allappoq.

Ukraine maannamut qaammatini arlalinni imassanik silaannakkullu illersuutinik amigaateqarpoq, Ruslandip rakettinik sakkortuunik aamma droninik ullut tamaasa saassussisarnera akiorniarlugu imassanik silaannakkullu illersuutinik amigaateqarpoq. Aamma nunami saassussisunut akiuiniutissanik granatinik amigaateqartoqarluni.

USA-mi nalorninartorsiorsimanerup nalaani Europa sakkussatigut Ukrainemut ikiuiniarsimavoq. Kisianni Europa USA-misulli sakkussiatigut pilersuisinnaassuseqanngilaq.

Amerikamiut sakkussiatigut ikiorsiissutaasa, maanna Ukrainemi utaqqineqartut,pilertortumik tikiussorneqarnissaat naatsorsuutigineqarpoq.

Naalagaaffiit killiit suleqatigiiffiata ilaanni naalakkersuisoqarfimmit, Financial Times-imut oqarpoq, sakkussiatigut ikiorsiissutit imassallu ilaat Polenimi illoqarfimmi Rzeszorimi Ukrainemut killeqarfimmiitinneqartut.

Ukrainemut ikiorsiissutit saniatigut USA-mi Inatsisartut Illuannit 26,8 milliardit dollarinik Israelimut ikiorsiissuteqartoqassasoq aalajangiunneqarpoq, tassungalu atatillugu ilaatigut silaannakkut illersuutissanut annertusaataasussanik ilaqarluni, piffissami matumani Iranimut tunngatillugu annertuumik aarlerinartorsiortoqarmat.

Taiwanimut ikiorsiissutit 8 milliardit dollarit missaanniipput, taannalu USA-mit Kinamut nalunaarutitut isigineqartariaqarpoq Taiwan iligisallu allat sumiiffimmiittut USA-mit tapersersorneqartut.

Aalajangiinermuttaaq ilaavoq aningaasat Ruslandimeersut Amerikami aningaaserivinniitinneqartut arsaarinnissutigineqassasut Ukrainemullu tunniunneqassasut.

- Iliuuserineqartup akinissaanut periarfissat nassaarissavagut, præsident Vladimir Putinip oqaaseqartartua Dmitrij Peskov, nutaarsiassaqartitsivimmut Tassimut oqarpoq. Tamanna USA-p inissisimaneranut ajoqusiisinnaavoq, taanna isumaqarpoq.

/ritzau