Ukrainep inatsisartuisa naalakkersuisut nikitsitereerneranni allamik ministeriuninngortitsinissaq akuersissutigigaat

Ukrainep inatsisartuisa Julija Svyrydenkop Ukrainemi ministeriuninngornissaa sisamanngornermi taasissutigimmassuk amerlanerussuteqartut akuersipput.

Ukrainep inatsisartuini ilaasortat arlallit taama ilisimatitsipput.

Svyrydenkop ministeriuninngornissaa politikerit oqarnerat naapertorlugu inatsisartuni ilaasortani 450-iusuni 262-init tapersersorneqarpoq.

Svyrydenko præsidentimit Volodymyr Zelenskyj-imit aamma tapersersorneqarpoq, Ukrainemilu naalakkersuisut malittarisassanik atorunnaarsitsinissamik nunanillu iligisanik aningaasaqarnikkut suleqateqarnerulernissamik ukkataqaleqqullugit nikitsiternissaat kissaatigigini Zelenskyj-p qanittukkut oqaatigaa.

39-nik ukiulik Julija Svyrydenko Ukrainemi 2021-mili aningaasaqarnermut ministeriullunilu ministeriunermut tullersortit ilagaat.

USA-p aningaasaqarnermut ministerianik Scott Bessentimik isumaqatiginninniarnerni aammma siuttuusarsimavoq. 

Ukrainep aatsitassanik qaqutigoortunik USA-mut tunisaqarnissaannik, nunat marluk taakkua ukioq manna siusinnerusukkut isumaqatigiipput. USA Ukrainemi sanaqqinnissamut paarlattuanik aningaasalersuissaaq.

Ukrainemi illersornissamut atugassanik sakkussiornerusoqalernissaa, Julija Svyrydenkop aamma isumagisassaraa.

Ukrainemi naalakkersuisunngortut sakkutuuminnut nunagisaminni sakkussiornerup 40 procentimiit ukiup affaata ingerlanerani 50-procentimut annertusinissaanik qularnaarissaat naatsorsuutigigini, Zelenskyj-p inatsisartunut oqalugiarnermini ilisimatitsissutigaa.

USA-lu isumaqatigiissutitik amerliumaartut, Ukrainep præsidentiata aamma oqaatigaa. Tamannali pillugu allamik oqaaseqanngilaq.

Ministeriuninngoruni suliniuteqalertorumaarluni, Svyrydenko neriorsuivoq.

- Kinguartitsinerit sorsunnermi inissaqartinneqanngillat, taanna inoqatinut attaveqaammi X-imi allappoq.

- Qaammatini arfinilinni siullerni pingaarnertut suliniutissavut suusut nalunanngilaq: sakkutuunut tutsuiginartumik pilersuinissaq, nunatsinni sakkussiornerulernissaq illersornissaqarfittalu pitsaanerusunik atortorissaaruteqarlernissaa.

Ukrainemiut russit, Ruslandip Ukrainemi nunap immikkoortuinik arlalinnik tiguaaneranik kinguneqartumik nunamut tassunga 2022-mi saassussinerata kingornali, sorsuppaat.

Nunaminni sakkussiornerulerneq Ruslandimit saassunneqartillutik imminnut illersorluarnerulersinnaanissaannik kinguneqarumaartoq, Ukrainemiut neriuutigaat.

/ritzau/Reuters