POLITIIT
Ulloq unnuarlu nalunaarusiaq: Inuit marluk imigassartorsimallutik biilersimasutut tigusarineqarput
Kalaallit Nunaanni Politiit tallimanngornerup unnuaani ulapaartoqarsimaneranik nalunaaruteqarput.
Assiliisoq: Leiff Josefsen
Aqqusinermi eqqissiviilliornerit assigiinngitsut sinerissami Nuummilu tallimanngornerup unnuaani Kalaallit Nunaanni Politiit ulapputigisimavaat.
Tamanna pigaartut pisortaata Aputsiaq Hansenip Sermitsiamut oqaluttuaraa.
Aammattaaq ulloq unnuarlu kingullermi imigassartorsimatilluni biilertoqarnera pillugu suliat marluk politiit nalunaarsorsimavaat.
Nanortalimmi arnaq tallimanngornermi ualikkut nalunaaqutaq 14.17 imigassartorsimatilluni biilertutut pasineqarluni unitsinneqarpoq.
Promille akuerisaasoq qaangerlugu arnaq imigassartorsimasoq alkometerimut supusinerani paasineqarpoq, taamaattumillu tigusarineqarpoq promilleatalu qaffasissusaa paasiumallugu aaversinniassammat napparsimmavimmukaanneqarluni.
Arfininngornermi ullaakkut nalunaaqutaq 05.49 imigassartorsimatilluni biilertoq pillugu nalunaarummik allamik, tamatumuuna Ilulissani, politiit nalunaarfigineqarput.
Biilit politiinit unitsinneqarput, tamatumanilu aamma alkometerimut supusititsinikkut akuerisaasoq qaangerlugu biilertoq imigassartorsimasoq paasineqarpoq.
Angut 30-t sinnerlugit ukioqartoq pineqarpoq, taannalu aamma aaversisinniarlugu napparsimmavimmukaanneqarpoq.
